Sekretáriu Rejionál Asuntu Agrikultura, José Eta, kuarta (29/09) ne’e kolleta hare Membramo faze daruak iha Cunha. Imajen Tatoli/Abílio Elo Nini.

OÉ-CUSSE, 29 setembru 2021 (TATOLI)—Sekretáriu Rejionál Asuntu Agrikultura liuhosi ekipa téknika hosi Departamentu Ekstensaun no Agrikultura Bázika Familiar, kuarte ne’e halo crop-cutting ba área natar Petun hodi kolleta hare Membramo ba faze daruak iha suku Cunha, sub-rejiaun Pante Makasar.

Sekretáriu Rejionál Asuntu Agrikultura, José Eta, hateten rezultadu hosi atividade crop-cutting ne’e hatudu produtividade tonelada 3.9 kada ektare, ba aplikasaun sistema Jajar Legowo 2:1 no tonelada 2.6 kada ektare ba kultivasaun ho sistema konvensionál.

Notísia Relevante: Agrikultór natar suku Cunha hahú halai natar faze daruák

“Ha’u informa katak área natar Petun, iha tinan ida-ne’e, (2021) konsege halai natar ba dala rua. Pimeiru, agrikultor sira kolleta iha fulan abril no kolleta faze daruak mak agora daudaun ne’e, tanba debitu kualidade bee iha barajen Mota Tono sufisiente. Tanba ne’e mak agrikultór sira deside tinan ida de’it bele halai natar ba dala-rua,” José Eta informa ba Agência Tatoli.

Nia informa, mezmu bee menus ba área natar sira iha Petun maibé la’ós falla totál tanba iha natar hamutuk ektare 34.9 ho totál benefisiáriu uma kain 132 mak konsege kolleta, no área natar ne’ebé la konsege kolleta hamutuk ektare 7.2 ho totál uma kain 43, tanba tarde halo preparasaun ba viveiru hare-oan.

Tuir loloos, nia dehan, natar sira iha Petun kolleta hare ho susesu tanba iha fulan abril ne’e sira kolleta faze primeiru, entaun iha fulan maiu tuir loloos hahú kuda ba faze daruak nian maibé agrikultór sira kuda fali iha fulan jullu, entaun natar ektare 7,2 mak falla kolleta.

Xefe P3A ba sistema barajen Mota Tono-1, Jeca de Carvalho, agradese ba autoridade tanba apoiu téknika aplikasaun sistema Jajar Legowo 2:1 ba kultivasaun ho sistema konvensional.

“Ami hanesan natar na’in agradese ba autoridade liuhosi agrikultura, tanba apoiu ona téknika oinsá kuda haree tuir sistema modernu nian. Ami espera, iha tinan oin, husu nafatin autoridade atu kontinua akompaña ami, maske iha preokupasaun kona-bá debitu bee menus maibé ami agradese tanba kolleta faze primeiru la’o ho susesu,” nia dehan.

Natar na’in, Jeca de Carvalho rekoñese natar sira iha Petun daudaun ne’e iha hela problema, tanba debitu kualidade bee ladún másimu atu fornese ba natar sira tanba agrikultor sira mak atraza prepara viveiru haree-oan.

Entretantu, atividade crop-cutting ne’e hetan akompañamentu hosi Sekretáriu Rejionál Asuntu Agrikultura, Jose Eta, Diretór Dirasaun Rejional Agrikultura, Cirilo dos Remedios Baba, Xefe P3A ba sistema barajen Mota Tono-1 Jeca de Carvalho, inklui natar na’in sira.

Notísia Relevante: PA RAEOA kolleta hare Membramo iha Pante Makasar

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here