Primeiru Ministru, Taur Matan Ruak, prezide reuniaun Konsellu Ministru, Iha Palásiu Governu, segunda (29/09). Imajen TATOLI/Francisco Sony

DILI, 29 setembru 2021 (TATOLI)–Governu Timor-Leste liuhosi Ministériu Transporte no Komunikasaun (MTK) sei asina akordu servisu aéreu rua ho Emiradu Árabe Unidu no Qatar.

“Akordu sira-ne’e atu impulsiona konetividade entre Timor-Leste no país seluk iha mundu, ne’ebé permite atu kria kondisaun ba operasaun ligasaun aérea regulár sira iha país no aumenta opsaun destinu sira,” Ministru Prezidénsia Konsellu Ministru, Fidelis Manuel Leite Magalhães, informa, iha reuniaun ezekutivu, iha Palásiu Governu, kuarta ne’e.

Tanba ne’e, liuhosi reuniaun Konsellu Ministru, ezekutivu sira delibera no fó podér tomak ba Ministru Transporte no Komunikasaun, José Agustinho da Silva, atu asina akordu servisu aéreu.

Antes ne’e, KM atribui poder ba MTK atu selebra akordu servisu aéreu ho Brunei Darusalam.

Notísia relevante: Timor-Leste no Brunei Darusalam sei selebra akordu iha servisu aéreu

Akordu ne’e ho objetivu atu impulsiona konetividade hosi Timor-Leste no mundu tomak no sei permite empreza servisu aéreu sira ne’ebé dezigna hosi país rua bele ne’e bele fasilita ligasaun di’ak liután no iha posibilidade bele iha ligasaun Royal Brunei hosi Brunei mai diretamente Timór no hosi Timór ba Brunei.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here