Ministériu Saúde (MS) hala’o formasaun ba pesoál saúde no autoridade munisípiu Viqueque, kona-bá programa Area La So’e Foer Arbiru (ALFA), ba implementasaun Planu Asaun Komunidade Ijiéne, kuarta (29/09/21). Imajen Tatoli/Vitorino Lopes da Costa.

VIQUEQUE, 29 setembru 2021 (TATOLI)—Ministériu Saúde (MS) hala’o formasaun no sensibilizasaun ba pesoál saúde ho autoridade munisípiu Viqueque, kona-bá programa Area La So’e Foer Arbiru (ALFA), ba implementasaun Planu Asaun Komunidade Ijiéne.

Objetivu hosi sensibilizasaun no kapasitasaun durante loron tolu ne’e, atu hasa’e liu tán kapasidade pesoál saúde no autoridade munisípu Viqueque, kona-bá programa ALFA, aumenta abilidade hodi hatutan ba komunidade, nune’e  bele moris ho ijiéne iha ida-idak nia uma.

Notísia relevante:Likisá Livre Ona Husi ALFA

“Planu deklara ALFA, hanesan programa di’ak, tanba ne’e pesoál saúde sira sei ba vizita direta komunidade atu bele motiva hodi prepara fasilidade sanitária rasik,”Diretór Aprozionamentu Finansa iha Institutu Nasionál Saúde (INS), Jacinto de Oliveira Guterres, hateten ba jornalista iha salaun Borala Viqueque, kuarta ne’e.

Iha fatin hanesan, administradór munisípiu Viqueque, Januário Soares Bolly, konsidera formasaun ne’e importante atu bele hasa’e koñesimentu komunidade labele so’e foer no foer boot arbiru, no oras ne’e daudaun mós besik ona tempu udan.

Iha biban ne’e, administradór postu administradór Viqueque Vila, António Gregório dekalra katak, agora daudaun preokupasaun boot ida maka komunidade so’e foer abiru no sei falta bee moos.

Tanba ne’e, nia husu ba komunidade atu labele so’e foer arbiru no mós husu atu utiliza bee oitoan ne’ebé oras ne’e daudaun iha, ba nesesidade, tanba autoridade munisipál sei serbisu hamutuk atu oinsa rezolve hamutuk preokupasaun ne’ebé komunidade hasoru, fazeadamente.

Kapasitasaun ne’e partisipa hosi adiministradór munisípiu Viqueque, administradór postu administrativu lima, komadante eskudra Polísia Nasionál Timor-Leste (PNTL) postu Viqueque Villa, pesoál saúde-sira hosi postu administrativu lima no xefe aldeia-sira.

Formasaun ne’e Institutu Nasionál Saúde (INS) realiza, tanba finansia hosi Orsamentu Jerál Estadu (OJE) 2021.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here