Komunidade balun kontinua hela iha lona okos, tanba impaktu hosi inundasaun iha loron 04 abríl 2021, iha Manleuana, tersa (07/09). Imajen TATOLI/Francisco Sony

DILI, 29 setembru 2021 (TATOLI)—Vise Primeiru-Ministru no Ministru Planu Ordenamentu (MPO), José Maria dos Reis, no Ministru Administrasaun Estatál (MAE), Miguel  Pereira da Costa, aprezenta iha reuniaun Konsellu Ministru, kona-ba opsaun fatin implementa sentru akollimentu multifunsaun ba vítima inundasaun.

Tuir Ministru Prezidénsia Konsellu Ministru, Fidelis Manuel Leite Magalhães, inisiativa ne’e hodi hatán ba situasaun emerjénsia no atu funsiona sentru akollimentu temporáriu ba vítima asidente grave no dezastre naturál sira.

“Konsellu Ministru laiha objesaun ba proposta, iha fatin rua mak hanesan Manleuana no Metinaro,” Ministru Fidelis, hateten hafoin reuniaun ezekutivu, iha Palásiu Governu, kuarta ne’e.

Notísia relevante: Governu planeia kria sentru akollimentu multifunsaun

Hafoin reuniaun ne’e, ezekutivu sira husu Ministru kompetente sira atu uza kompeténsia legál atu avansa ho prosesu ne’e, atu negosia hodi liberta no asegura fatin identifikadu, nune’e hahú halo serbisu iha tempu badak. 

Daudaun iha ema hamutuk na’in-731 maka hela iha sentru akollimentu ativu neen iha sidade Dili.

Hafoin inundasaun iha loron 04 abríl 2021, ema hamutuk na’in-34 maka mate no na’in-14 maka lakon iha nível nasionál, família hamutuk 30.322 maka afeta ba inundasaun, ne’ebé entre família sira ne’e, família 24.816 hosi munisípiu Dili no uma hamutuk 4.231 mak hetan estragu totál.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here