Padre Pároku Sagradu Corração de Jesus Villa nova, Benediktus Randun, fó bensaun ba membru F-FDTL hamutuk na’in-20 hamutuk ho sira-nia parseiru, bainhira simu sakramentu matrimóniu, iha Kapela São Miguel Arcanjo, iha Bairru Militar Lanud Baucau, kuarta (29/09). Imajen TATOLI/Natalino Belo

BAUCAU, 29 setembru 2021 (TATOLI)–Komponente terrestre Baucau selebra misa loron São Miguel Arcanjo, ne’ebé nu’udar mahein ba FALINTIL-Forsa Defeza Timor-Leste (F-FDTL), ne’ebé iha loron hanesan, membru na’in-20 simu sakramentu matrimóniu.

Padre Pároku Sagrado Corração de Jesus, Villa nova, Benediktus Randun, husu atu superior no família hotu, sai sasin ba noivu no noiva, ba loron espesiál ne’e.

Tuir Amu selebrante, objetivu moris mak buka lalehan la’ós infernu, tanba ne’e bainhira noivu no noiva kuandu hakarak sai santu, tenki defende domin iha uma-kain.

“Imi mai simu sakramentu matrimóniu ida-ne’e, tenki halo santo imi-nia domin iha Maromak nia oin, ha’u husu imi loke laran ba Maromak atu grasa mai iha fuan, espesiál ba noivu no noiva hotu,” Padre Pároku, hateten, iha Kapela São Miguel Arcanjo, Bairru Militár Lanud, kuarta ne’e.

Padre Benediktus dehan, Anju na’in-tolu hanesan ekipa servisu hosi Maromak ne’ebé iha knaar diferente, maibé objetivu ida de’it, atu konkretiza domin ba ema iha mundu.

Ekipa servisu Maromak ni’an mak Anju mak Anju Gabriel ho knaar lori mesajen importante hosi Maromak ba ema, Anju Rafael hanesan doutór ne’ebé kura moras no Miguel Arcanjo rasik hanesan Anju protetór hosi diabu ninia ukun.

Nune’e, Amu ne’e husu F-FDTL Komponente Terrestre, tenki servisu ho ekipa, nune’e hatutan misaun servisu iha Maromak ninia domin.

Selebrasaun misa ne’e partisipa  hosi Komandante Komponente Terrestre, Segundu Komandante Polísia Nasionál Timor-Leste (PNTL) Baucau, konvidadu sira inklui família no membru F-FDTL.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here