Primeiru Ministru, Taur Matan Ruak, prezide reuniaun Konsellu Ministru, Iha Palásiu Governu, segunda (29/09). Imajen TATOLI/Francisco Sony

DILI, 29 setembru 2021 (TATOLI)–Governu liuhosi reuniaun Konsellu Ministru (KM) deside hodi la renova serka sanitária iha munisípiu Dili.

“La renova serka sanitária iha munisípiu Dili, ne’ebé remata ohin tuku 23:59,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha Palásiu Governu, kuarta ne’e.

Foin lalais, Konsellu Ministru deside hodi renova serka sanitária iha munisípiu Dili durante loron hitu to’o 23:59 to’o loron 29 setembru 2021.

Desizaun ne’e ezekutivu sira foti hafoin analiza aprezentasaun pontu situasaun epidemiolójika país , ne’ebé hala’o hosi Koordenadór Sala Situasaun Sentru Integradu Jestaun (CIGC, sigla portugés).

Notísia relevante: CIGC rekomenda Governu hakotu serka sanitária iha Dili

Antes ne’e, CIGG sujere ba Governu atu termina serka sanitária iha Dili tanba númeru kazu infetadu COVID-19 iha Timor-Leste liliu Dili kada loron menus.

Kazu akumuladu infesaun COVID-19 hahú 20 marsu 2020 to’o agora hamutuk 19.000 no kazu rekuperadu 18.000 resin no óbitu rejistadu desde inísiu hamutuk 113.

To’o loron 27 setembru 2021 ne’e, rejista kazu foun 16, kompostu hosi Dili neen no munisípiu seluk 10, rekuperadu 90 no kazu ativu 920.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here