Família matebian ANC, Jeferina Marsela da Silva. Imajen TATOLI/Natalino Belo

BAUCAU, 29 setembru 2021 (TATOLI)—Família matebian ANC, Jeferina Marsela da Silva,  lamenta tanba ekipa responsável koveiru hosi Sentru Integradu Jestaun Krize (CIGC, sigla portugés) tarde haloot mate-isin pasiente COVID-19.

“Ha’u sente triste tanba ha’u-nia alin mate tanba Covid-19, ha’u ho ha’u-nia ama-ferik hein iha mortuáriu durante loron-rua, maibé laiha pesoál saúde ida mak mai. Foin mak sira mai dehan família hakarak lori ba uma hodi hala’o seremónia funebre tenke oras ida ka rua, hodi hein ekipa koveiru hosi nasionál to’o mak bele haloot,” Jeferina Marsela hateten iha mortuáriu eis Ospitál Baucau, Villa-antiga, kuarta ne’e.

Família preokupa ho ANC tanba hakotu iis tanba COVID-19, maibé ekipa koveirus hosi CIGC nasionál seidauk to’o atu haloot mate-isin tuir protukolu saúde, hanesan uza protesaun pesoál.

“Ha’u-nia alin laran-sa’e no muta, nune’e ambulánsia evakua ba sentru saúde Bucoli no hosi ne’ebá transfere mai iha Hospitál Rejional Eduardo Ximenes (HoREX) hodi halo teste swab iha tersa (21/09), ho rezultadu pozitivu COVID-19, nune’e transfere fila mai sala izolamentu mak mate iha ne’e,” nia akresenta.

Koordenadór CIGC Baucau, Adolfo Dias Marçal. Imajen TATOLI/Natalino Belo

Hatan ba kestaun ne’e, Koordenadór CIGC Baucau, Adolfo Dias Marçal, hateten, matebian sofre moras fuan, ne’ebé antes ne’e halo tratamentu iha Malázia ho Indonézia, maibé la konsege kura hodi lori fila mai Timór.

“Durante ANC iha izolamentu, ekipa halo tratamentu másimu maibé iha loron tersa (28/09) tuku 14:00 lorokraik, nia hakotu iis iha izolamentu,” Koodernadór ne’e esplika.

Matebian ANC, hanesan feto ida ho idade 23 hosi suku Bucoli, postu Baucau villa, hakotu iis hafoin semana-ida tama izolamentu iha eis SPK tanba infetadu COVID-19.

Tuir Koordenadór, maski mate-isin pasiente COVID-19, maibé loron-ida ona iha mortuáriu tanba hein ekipa koveiru sira to’o maka haloot tuir protókolu saúde.

“Ita-nia ekipa koveiru hosi nasionál sei to’o ohin, nune’e hamutuk ho família matebian hodi haloot tuir protókolu mundiál saúde,” nia hatutan.

CIGC iha ona planu atu rekruta ema na’in-10 atu sai ekipa koveiru iha munisípiu Baucau hodi hafasil haloot mate-isin pasiente COVID-19

“Ema ne’ebé liu sei tuir treinamentu kona-ba oinsá maneira hatais, hakoi mate-isin no proteje sira-nia an bainhira haloot mate-isin pasiente COVID-19,” nia dehan.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here