Jerente Akreditasaun no Sertifikasaun hosi Institutu Nasionál Dezenvolvimentu Mão de Obra (INDMO), Amandio Livio B. Belo. Imajen Tatoli/Nelia Fernandes.

DILI, 29 setembru 2021 (TATOLI)—Jerente Akreditasaun no Sertifikasaun Institutu Nasionál Dezenvolvimentu Mão de Obra (INDMO), Amandio Livio B. Belo, hateten bainhira atu estabelese sentru formasaun presiza prenxe rekezitu hosi INDMO.

“Sentru formasaun sira atu rejistu, ita iha kritériu lubuk ida-ne’ebé mak sentru ne’e tenke kompleta. Kritériu jerál mak haree ba sentru ne’e nia ezisténsia ne’ebé haree hosi nia legalidade sira. Sentru ne’e tenke rejistu iha Ministériu Justisa no seluk fali mós hetan legalidade hosi SERVE. Legalidade hirak ne’e, na’in ba sentru sira presiza haree,” Amandio Livio B. Belo, hateten ba Agência Tatoli, iha nia knaarfatin, Dili, kuarta ne’e.

Kritériu seluk haree fali ba sentru ne’e nia fasilidade no ekipamentu sira-ne’ebé iha atu implementa formasaun sira, nomós haree fali ba sirania formadór na’in hira no nia kualIfikasaun no ema ne’ebé servisu iha administrasaun ne’e na’in hira.

Iha kritériu seluk, nia dehan, INDMO sei haree mós ba prosesu rekrutamentu ba formadór sira ne’e bolu de’it mai ka tuir prosesu rekrutamentu ruma, ne’ebé sira presiza halo no haree mós ba promosaun sira-ne’ebé mak iha sentru ne’e rasik halo ba públiku.

Iha kritériu seluk, sirania rekursu ka materiál sira-ne’ebé sira uza ba hanorin iha sentru formasaun ne’e tenke sufisiente.

Ezemplu, iha komputadór no manuál sira-ne’ebé sira uza ba hanorin hanesan rekursu livru ka buat ne’ebé relevante no karik sira iha biblioteka rasik.

Sentru formasaun ida atu hetan akreditasaun hosi INDMO, nia dehan, iha kritériu ein-jerál ne’ebé sira tenke prenxe mak bazea ba área formasaun sira.

“Ezemplu, iha formasaun ne’e atu hanorin iha área komputadór karik ita halo akreditasaun ketak. Administrasaun mós halo akreditasaun ketak no ba hotelária mós halo akreditasaun ketak,” nia esplika.

Hosi kretériu jerál ne’ebé INDMO haree ba akreditasaun nian, maka haree ba fasilidade no ekipamentu relevante sira ba área formasaun ne’ebé sira estabelese no fó hanorin.

“Hanesan komputadór karik nia espesifikasaun ba komputadór mak saida, fasilidade saida mak tenke relevansia ba komputadór nian. Ida seluk fali mós, ita haree ba kualifikasaun ba formadór ne’ebé mak atu hanorin iha área komputadór ne’e nia kualifikasaun pelemenus iha rua, ida nia tenke iha backround ba komputadór (IT), seluk fali nia tenke iha metodolojia hanorin,” nia dehan.

Nune’e, INDMO iha padraun minimu ba rekursu hanesan oinsá estruturamente atu hakerek rekursu, tanba iha rekursu ne’e INDMO deskreve buat tolu iha ne’ebá mak manuál ba mestre atu uza hodi hanorin, manuál ba estudante no seluk fali manuál ba oinsa atu uza ba rekursu ba avaliasaun.

Liuhosi kritériu hirak ne’e, bainhira sentru formasaun sira atu mai halo rejistu INDMO fó kretériu hirak ne’e ba sentru formasaun, hafoin sira halo aplikasaun mai iha INDMO, inklui dokumentu sira ne’ebé presiza tenke anexa ho formuláriu aplikasaun depois INDMO verifika.

“Ezemplu, iha formadór nia iha kualifikasaun ba informátika (IT), maibé formadór ne’e seidauk iha kualifikasaun training asesment, entaun ita rekomenda ba sira katak ami fó tempu ba itaboot sira tenke haruka itaboot nia formadór hodi partisipa iha kursu training asesment nian. Hafoin ida-ne’e mai filafali hodi anexa iha dokumentu ho evidénsia,” nia informa.

Entretantu, tuir dadus hosi INDMO katak daudaun ne’e sentru formasaun ne’ebé rejistu iha INDMO hamutuk 95, enkuantu ba sentru formasaun ne’ebé akredita hosi INDMO hamutuk 25.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here