Feto potensiál Covalima partisipa iha sensibilizasaun kona-bá ai-han nutritive hosi Centro Comunidade Covalima (CCC). Imajen Tatoli/Celestina Teles.

COVALIMA, 29 setembru 2021 (TATOLI)—Centro Comunidade Covalima (CCC) realiza sensibilizasaun kona-bá ai-han nutritivu ba labarik sira no prevensaun COVID-19 ba feto potensiál no membru konsellu suku, atu belé haforsa liután sira-nia kuñesimentu atu hadi’a no prepara kualidade ai-han nutritivu ba labarik sira.

“Ami hala’o enkontru ho komunidade hodi sensibiliza informasaun kona-bá ai-han ne’ebè fó nutrisaun ba labarik sira. Tanba, liga ho situasaun COVID-19 ne’e ita-nia inan-aman sira ladúun preokupa ba labarik sira nia ai-han nutritivu tanba menus rendimentu,” Koordenadóra Programa Feto, Hilária Amaral do Carmo, hateten ba jornalista sira, iha salaun CCC, Covalima, kuarta ne’e.

Ho situasaun pandemia COVID-19 ne’e, CCC iha hanoin halo sensibilizasaun hodi hasa’e komunidade nia kuñesimentu kona-bá ai-han nutritivu ba labarik sira hodi belé implementa iha sira-nia família. 

Sentru komunidade ne’e iha ona politika atu halo protesaun ba labarik sira liuhosi haforsa no hala’o advokasia kona-bá oinsá fó ai-han ne’ebé iha nutrisaun ba labarik sira, tanba labarik mak futuru ba nasaun nian.

District Program Health Officer Munisípiu Covalima, Eugebio de Araújo, hateten ai-han ne’ebè fó nutrisaun ba labarik sira mak labarik sira tenke konsumu produtu lokal hanesan fehuk, talas, batar, akar, manu-tolun, na’an, fore mungu no seluk tán mak bele halo labarik nia kresimentu sai di’ak.

“Ai-han sira-ne’e halo labarik nia kresimentu isin-lolon nian di’ak no bele proteje labarik sira hosi moras oioin,” nia dehan.

Partisipante ida, Faustina de Rita, hateten sensibilizasaun kona-bá ai-han nutritivu ba labarik sira-ne’e importante, tanba durante ne’e nia laiha kuñesimentu atu fó ai-han ne’ebé iha nutrisaun di’ak ba labarik sira hodi konsumu.

“Durante ne’e, nu’udar inan, ami laiha kuñesimentu kona-bá hahan nutrivu. Entaun, ami fó konsumu hahan ba labarik sira bazea ba saida mak ami prodús no hetan,” nia dehan.

Programa sensibiliza ai-han nutrisaun ba labarik sira-ne’e, partisipa hosi membru estrutura konselu suku, ema ho difisiénsia, grupo feto potensiál, vendedóra inklui Stakeholder sira.

Programa ida-ne’e, suporta hosi International Women’s Development Agency (IWDA) ne’ebé hahú halo parseiru ho Centro Comunidade Covalima (CCC) dezde tinan 2009 to’o ohin loron. 

Jornalista : Celestina Teles

Editór       : Cancio Ximenes

HAKEREK NO HATÁN

Please enter your comment!
Please enter your name here