Selebrasaun Misa ba Saudozu António João Gomes da Costa ‘Ma’Huno Bulerek Karathayano. Iha Igreja Katedral Dili, tersa (28/09). Imajen Tatoli/Francisco Sony

DILI, 28 setembru 2021 (TATOLI)-Padre Guilhermino da Silva SDB hateten Saudozu  António João Gomes da Costa “Ma’Huno Bulerek Karathayano” ninia luta ba nasaun Timor-Leste, família no sosiedade to’o ona rohan.

Pe.Guilhermino da Silva hato’o asuntu ne’e iha ninia omilia bainhira prezide misa requem ba matebian saudozu Ma’huno iha Igreja María  Imaculada Conceição Katedral, Dili, tersa ne’e.

Padre Parokia Motael, Gilermino da Silva SDB, prezidi selebrasaun misa ba Saudozu António João Gomes da Costa ‘Ma’Huno Bulerek Karathayano. Iha Igreja Katedral Dili, tersa (28/09). Imajen Tatoli/Francisco Sony

Notísia Relevante :Saudozu Ma’Huno sei haloot iha bloku foun besik Xavier Amaral

“Durante nia moris luta hodi hakonu nia moris rasik, luta ba familia, sosiedade no nasaun Timor-Leste nia di’ak, no luta atu fó sentidu ba moris nian to’o ona rohan, basá nia saran filafali moris ne’ebé nia simu hosi Nai-nia liman atu hakonu moris ita ema nian,”Amu selebrante hateten.

Matebian nia luta sai istoria ba jerasaun foun sira atu banati tuir nune’e bele kontribui ba prosesu dezenvolvimentu Timor-Leste nian iha futuru.

Nia dehan Timoroan hotu merese atu hato’o  agradese ua’in ba Maromak tanba fó ona eroi di’ak ida hanesan saudozu Ma’huno ne’ebé dedika nia moris tomak hodi luta ba liberta nasaun, povu no soberania nasionál.

“Iha Momentu ida ne’e ita lakon ema di’ak ida ne’ebé ita hadomi, tanba ita laiha kbi’it no forsa atu halo tan buat hotu sai furak hanesan uluk  nakonu ho ksolok ita-nia moris, tanba ne’e ita koko atu moris ho Maromak-nia hakarak no planu hanesan iha evanjellu São João hateten ita hametin liután ita-nia neon no laran fiar lorloron atu hetan salvasaun,” nia dehan

Atu matebian nia klamar hetan ksolok no hakmatek iha reinu Lalehan nian, nia suzere atu Timoroan hotu-hotu nafatin suporta orasaun ba saudozu António João Gomes da Costa “Ma’Huno Bulerek Karathayano.

Entretantu, misa requem ne’e partisipa husi Xefe Estadu Maiór FALINTIL-Forsa Defeza Timor-Leste (F-FDTL) Tenente Jenerál Lere Anan Timur, Major Jenerál F-FDTL, Falur Rate Laek,  Komandante Jerál Polísia Nasionál Timor-Leste (PNTL) Faustino da Costa, Eis Prezidente Repúblika, José Manuel Ramos Horta, veterenu sira, inkui membru Governu no sarani-sira. 

Hafoin misa família translada kedas mate-isin matebian nian bá  ninia uma-lisan iha Postu Administrativu Laleia, Munisípiu Manatuto hodi halo tuir serimonia kultura tuir tradisaun Timoroan sira-nian.

Notísia Relevante :Kuadru partidu FRETILIN presta omenajen ho tristeza ba Saudozu Ma’Huno

Jornalista : Arminda Fonseca

Editór : Agapito dos Santos

HAKEREK NO HATÁN

Please enter your comment!
Please enter your name here