Primeiru-Ministru,Taur Matan Ruak, hamutuk ho membru Governu diskute pedidu renovasaun deklarasaun EE da-XVIII hosi Prezidente Repúblika, iha sala plenária Parlamentu Nasionál, tersa (28/09). Imajen TATOLI/Egas Cristóvão.

DILI, 28 setembru 2021 (TATOLI)–Reprezentante Povu iha uma fukun Parlamentu Nasionál fó apresiasaun ba esfrosu Governu nian tanba númeru infetadu COVID-19 iha redusaun iha semana ikus ne’e.

Notísia Relevante: TL rejista ema na’in 113 mate ho COVID-19

Xefe Bankada Frente-Mudança (FM), Deputada Isabel Maria Freitas Ximenes fó apresiasaun ba Governu serbisu integradu iha ámbitu kombate propagasaun surtu COVID-19, tanba impaktu hosi serbisu integradu ne’e halo númeru kazu infetadu hahú tún iha semana rua ikus ne’e.

Nia dehan, esforsu hirak-ne’e hatudu rezultadu di’ak tanba dedikasaun hosi serbisu integradu entre Sentru Integradu ba Jestaun Krize (CIGC, sigla portugés), médiku, enfermeiru, ekipa saúde vijilánsia sira, forsa defeza no seguransa nomoos entidade voluntáriu sira.

“Espesialmentu ba médiku no ekipa saúde vijilánsia sira, ne’ebé mak hatuur medida ne’ebé mak di’ak no rezulta ita-nia númeru infetadu semana rua ikus ne’e diminui kompara ho semana sira ba kotuk ne’e,” Xefe Bankada Frente-Mudança fó apresiasaun ne’e liuhosi debate estensaun estadu emerjénsia bad ala-XVIII iha Parlamentu Nasionál, tersa ne’e.

Ho númeru infetadu hahú hatudu redusaun, Xefe Bankada FRETILIN, Deputadu Francisco Miranda Branco, rekomenda Governu nia prezensa iha área pontu entrada sira.

“Ami hakarak rekomenda ita-nia prezensa iha zona fronteriza, portu no aeroportu sira. La’ós de’it hasoru COVID-19 maibé mós ba ameasa sira seluk hanesan krime organizadu ne’ebé tenta tama iha ita-nia rain hodi frajiliza ita-nia Estadu,” nia propoin.

Entretantu, Xefe Bankada Kmanek Haburas Unidade Nacional Timor Oan (KHUNTO), Deputada Olinda Guterres, apresia ho VIII Governu Konstitusionál nia esforsu no husu atu vasinasaun tenke to’o 90%, nune’e Timor-Leste fila-fali ba normalidade.

Totál kazu konfirmadu hamutuk 19,382, kazu konfirmadu foun 32, kazu baixa hela 994, rekuperadu 18,275 no ema na’in 113 mate ona. Totál ne’e fó-sai iha loron 26 setembru foin lalais ne’e.

Notísia Relevante: COVID-19, pozitivu 16 no kazu ativu 920

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here