Pesoál saúde prepara ekipamentu atu fó vasina AstraZeneca ba abitante iha Sentru Saúde Comoro, segunda (13/09). Imajen TATOLI/António Gonçalves

DILI, 28 setembru 2021 (TATOLI)-Primeiru Ministru (PM), Taur Matan Ruak, husu ba profisionál saúde sira ne’ebé responsabiliza ba sistema konjeladór ka rai vasina, atu kontrola no kuidadu di’ak hodi garante vasina sira labele a’at.

“Ha’u alerta ba profisionál sira ne’ebé toma konta sistema konjeladór ka rai vasina atu tau atensaun ba ida-ne’e hodi garante vasina sira labele a’at,” PM Taur hateten iha sala plenária, Parlamentu Nasionál, tersa ne’e.

Xefe Governu hato’o kestaun ne’e, tanba simu ona relatóriu auditóriu hosi Inpensaun Jerál Estadu (IGE, sigla portugés) no Organizasaun Mundiál Saúde (OMS) ne’ebé hatudu katak vasina AstraZeneca a’at iha Hospitál Nasional Guido Valadares (HNGV) no postu aaúde munisípiu Suai, la’ós kestaun eletrisidade, maibé tanba falta kuidadu hosi resposabilidade sira.

“Vasina sira a’at,  ita ko’alia eletrisidade, maibé la’ós eletrisidade, tanba falta kuidadu ka neglijéncia. Tanba ha’u haruka ona Inspetór Jerál Estadu  no Ministériu Saúde halo inspesaun ba HNGV no postu saúde Suai, maibé hamosu konklusaun katak laiha ema mak tau matan loron-loron ba vasina sira,” PM akresenta.

PM Taur mos husu ba Ministra Saúde, Odete Maria Freitas Belo, atu haree bainhira problema jeradór, presiza resolve lalais atu labele estraga vasina.

“Ita tenke haree medida saida ba resposabilidade sira ne’ebé la tau matan no kuidadu ba vasina ne’e, atu ba oin sira bele kuidadu,” Xefe Ezekutivu subliña.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here