COVALIMA, 28 setembru 2021 (TATOLI)—Vise Ministru Justisa, José Edmundo Caetano, hamutuk ho ekipa divulga lei tolu ba autoridade lokál sira iha Covalima.
Nia hatutan, lei hirak ne’e mak lei númeru 13/2017 rezime espesiál ba definisaun titularidade bein imóvel, lei númeru 8/2017 kona-bá espropriasaun ba utilidade públika no lei númeru 9/2002 kona-bá nasionalidade
“Lei tolu ne’ebè ita-nia Estadu Timor-Leste liuhosi inisiativa Governu, parlamentu nasionál aprova no Prezidente Repúblika promulga ona, ami iha kompeténsia atu divulga lei ba ita-nia sosiedade hodi belé hatene no komprende no kumpre lei ne’ebè mak iha ona,” Vise-Ministru Justisa, José Edmundo Caetano, hateten ba jornaloista sira iha salaun administrasaun Covalima, tersa ne’e.
Durante divulgasaun lei tolu ne’e komunidade sira hato’o preokupasaun liu kona-bá nasionalidade iha tempu Indonézia halo transmigrasaun, sidadaun Indonézia sira hakarak sai sidadaun TL maibé tenke prenxe rekezitu lagál ba iha nasionalidade.
Xefi Suku Debos, Agustinho da Silva husu ba ministériu justisa kontinua divulga lei ne’e ba iha Postu Administrativu no suku sira iha área rurál at komunidade mós iha kuñesimentu kona-bá lei sira-ne’e.
“Ministériu justisa labelé halo divulgasaun lei iha de’it iha munisípiu, maibé presiza ba área rurál tanba ami-nia komunidade sira seidauk iha kuñesementu kona-ba lei ne’e,” Agustinho dehan.
Ministériu Justisa hala’o ona divulgasaun ba lei tolu refere ne’ebé hahú uluk iha munisípiu Manufahi no agora iha munisípiu Covalima.
Jornalista : Celestina Teles
Editór : Cancio Ximenes
