Primeiru-Ministru, Taur Matan Ruak, hamutuk ho membru Governu diskute pedidu renovasaun deklarasaun EE ba dala-XVIII hosi Prezidente Repúblika, iha sala plenária PN, tersa (28/09). Imajen TATOLI/Egas Cristóvão

DILI, 28 setembru 2021 (TATOLI)—Primeiru-Ministru no Ministru Interiór, Taur Matan Ruak, propoin ona ba Ministériu Finansa atu aloka osan balun ba Institutu Jestaun Ekipamentu, Institutu Públiku (IGE, I.P sigla portugés) atu loke estrada ba postu fronteira sira.

“Ha’u propoin iha Orsamentu Jerál Estadu tinan 2022, atu Ministru Finansa reforsa orsamentu balun ba IGE atu aumenta ekipamentu pezadu hodi loke dalan ba postu hotu iha fronteira atu fasilita sirkulasaun movimentu seguransa, liuliu kotrola ita-nia fronteira,” PM Taur hateten iha sala plenária, Parlamentu Nasionál, tersa ne’e.

Xefe Governu hato’o kestaun ne’e hodi responde ba preokupasaun deputadu-sira iha Parlamentu Nasionál, ne’ebé husu atu parte seguransa sira asegura fronteira terrestre.

“Ha’u hanesan Ministru Interiór mós preokupa ho situasaun fronteira, nune’e ita iha postu kuaze 30-resin iha fronteira inklui Rejiaun Administrativu Espesiál Oé-Cusse no Ambeno (RAEOA), ne’ebé iha planu atu tinan ne’e ramata bele aumenta postu 25,” nia informa.

Aumenta postu 25 ne’e, investimentu mai hosi  própriu orsamentu Governu nian, hosi fundu COVID-19  no apoiu hosi parseiru dezenvolvimentu sira.

Aleinde ne’e, Governu hahú hanoin atu hamosu unidade jestaun fronteira, ne’ebé uluk implementa iha tempu UNTAET no hametin koodenasaun didi’ak iha liña fronteira entre nasaun viziñu rua ne’e.

“Ha’u mós iha enkontru despedida ho Embaixadór Indonézia iha Timor-Leste, Sahat Sitorus ne’ebé husu ita kontinua hametin koordenasaun di’ak iha nível país rua hodi kontrolu fronteira Terrestre,” nia dehan.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here