Kaderneta Eskolár. Imajen/Espesiál

DILI, 28 setembru 2021 (TATOLI)–Estudante Ensinu Báziku terseiru siklu, Sekundáriu Jerál no Tékniku Vokasionál hamutuk 32.840 iha Manatuto seidauk hetan kaderneta eskolár.

Tuir Ofisiál Departementu Ensinu Munisípiu Manatuto, Filipe Alcino Borges, dadus estudante hosi Manatuto ne’ebé atu simu kaderneta eskolár, submete ona bá nasionál maibé estudante hosi nível tolu ne’e to’o agora seidauk hetan.

“Kada estudante nível tolu ne’e la hanesan. Ensinu Báziku terseiru siklu hamutuk 13.426, Ensinu Sekundáriu Jerál hamutuk 2.238 no Ensinu Sekundáriu Tékniku Vokasionál 17.176, enkuantu totál estudante nível tolu ne’e hamutuk 32.840 ,” Ofisiál Departementu Ensinu Munisipál ne’e informa ba Agência TATOLI, tersa ne’e.

Nia dehan, problema kaderneta eskolár sempre akontese ba estudante nível tolu ne’e, maibé estudante Ensinu Báziku primeiru no segundu siklu laiha problema tanba estudante sira ne’e hetan hotu ona distribuisaun kaderneta eskolár.

Enkuantu, estudante primeiru no segundu siklu ensinu báziku totál 9.196 hetan hotu ona kaderneta eskolár, ne’ebé distribuisaun ne’e realiza ona iha fulan hirak bá kotuk.

Ministériu Edukasaun Juventude no Desportu (MEJD) nasionál promete ba responsável edukasaun munisipál katak produsaun kaderneta eskolár kontinua la’o hela no tempu besik sira sei halo distribuisaun.

“Ami simu ona informasaun hosi diresaun kurikulár katak produsaun kaderneta eskolár kontinua prodúz nafatin no hein de’it kuandu remata ona parte nasionál sei informa,” nia hatutan.

MEJD liuhosi Diretór Jerál Ensinu Sekundáriu Luís Fernandes, konsidera mós estudante Ensinu Sekundáriu Jerál sira barak seidauk hetan kaderneta eskolár.

“Eskola balun bainhira ami halo verifikasaun ka observasaun, barak mak laiha kaderneta eskolár. Ami mós haree hela oinsá atu hatan asuntu ne’e hodi fó hatene ba servisu kuríkulu,” nia akresenta.

Jornalista : Tomé Amado

Editora      : Julia Chatarina

HAKEREK NO HATÁN

Please enter your comment!
Please enter your name here