Komisaun Nasionál Eleisaun (CNE-sigla portugés), hala’o enkontru ba dahuluk ho autoridade munisípiu Viqueque, kona-bá preparasaun eleisaun prezidensiál ne'ebé sei akontese iha 2022, tersa (28/09/21). Imajen Tatoli/ Vitorino Lopes da Costa.

VIQUEQUE, 28 setembru 2021 (TATOLI)—Komisaun Nasionál Eleisaun (CNE-sigla portugés), hala’o enkontru ba dahuluk ho autoridade munisípiu Viqueque, kona-bá preparasaun eleisaun prezidensiál ne’ebé sei akontese iha 2022.

“Ami simu pose iha fulan agostu, tanba ne’e, ohin ami mai introdús no mós aprezenta preparasaun eleisaun prezidensiál ne’ebé sei realiza iha 2022. Maski Prezidenti Repúblika seidauk dekreta, maibé ita tenke halo preparasaun,” Prezidente CNE, José Agostinho da Costa Belo, informa ba jornalista, iha salaun munisípiu Viqueque, tersa ne’e.

Notísia relevante:CNE-STAE-UNDP diskute preparasaun eleisaun prezidensiál iha vijénsia COVID-19

Prezidenti CNE José hatutan, estrutura CNE mai aprezenta an ho objetivu importante kona-bá promove parseria ho entidade iha rai laran nomós estranjeiru, atu bele hala’o mandatu no kompeténsia hanesan órgaun independente.

Enkontru ne’e, entreka mós komisaun destakadu na’in ida, Olandino da Costa Monteiro Almeida ba munisípiu rua hanesan Viqueque no Lautém, hodi tama konta ba munisípiu-rua.

Ikus nia dehan, data tentativa ba eleisaun presidensiál sei monu iha 19 marsu 2022 nian laran.

Iha abertura enkontru ne’e, adiministradór Munisípiu Viqueque, Januario Soares Bolly, haktuir, presenza CNE mai Viqueque importante tebes atu bele introdús preparasaun eleisaun prezidensiál ba autoridade sira, hodi hatutan fali ba populasaun iha baze.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here