Formasaun kombate HOAX. Imajen Tatoli/Abilio Elo Nini.

OÉ-CUSSE, 28 setembru 2021 (TATOLI)—Alumni Thematic Internasionál Exchange Seminars (TIES) Timor-Leste, tersa ne’e realiza formasaun no sensibilizasaun kona-bá oinsá kombate informasaun falsu (hoax) liuhosi literásia mídia bazea ba programa verifika faktu liuhosi internet ba jornalista Rádio Comunidade Atoni Lifau (RCAL)  iha Rejiaun Administrativa Espesiál Oé-Cusse Ambeno.

Formadór Programa Alumni TIES, Raimundus Oki, hateten eventu ne’e hetan apoiu finanseiru hosi Estadu Unidu Amerika (EUA) ho nia programa ida naran ALUMNI TIES hodi fahe informasaun ba maluk jornalista sira iha munisipiu neen (6) hanesan Dili, Aileu, Ainaro, Manufahi, Covalima no Oé-Cusse.

“Ohin fahe informasuan kona-bá oinsa atu halo verifika faktu bazeadu iha online, ho objetivu hosi fahe informasaun ba malu ne’e atu fasilita maluk jornalista sira iha munisipiu neen (6) atu oinsá bele uza ferramenta (tools) sira hanesan SpyonWeb, YouTube DataViewer, Google Reverse Search Image, Yandex, Baidu, InVid for debunking fake news no seluk-tán, hodi kombate informasaun falsu sira-ne’ebé espalla iha plata forma média social.” Raimundus Oki hateten ba Agência Tatoli iha edifisiu RCAL Oésono, Oé-Cusse, tersa ne’e.

Formasaun ne’e hala’o ona iha munisipiu sira iha teritóriu Timor-Leste, no ohin termina ona iha Oé-Cusse. Rezultadu hosi formasaun ne’e rezulta jornalista lubuk ida mak iha ona koñesementu báziku kona-bá oinsá uza ferramenta sira-ne’e hodi kombate notísia falsu ne’ebé espalla iha plata forma media sosiál no iha sosiedade nia le’et.

“Ami mós iha planu ona hodi halo Fact Check Alliance iha Timor-Leste iha tempu ruma. no tipu formasaun ne’e sei kontinua la’o nafatin ba oin,” nia informa.

Partisipante no Atuál Jestór Rádiu Komunidade Atoni Lifau, José Fransisco Efi, agradese ba formadór hosi programa ALUMNI TIES tanba ho sensibilizasaun kona-bá verifika faktu bazeadu iha online no mídia literási ne’ebé mak fahe ona ba jornalista RCAL atu bele aumenta jornalista sira-nia kuñesimentu kona-bá kombate informasaun falsu ne’e.

“Ami orgullu no agradese ba programa ne’e, tanba bele hasa’e koñesimentu jornalista no joven sira-nian kona-bá utilizasaun mídia sosiál, liu-liu verifika faktu públikasaun iha mídia sosiál hanesan imajen no video. Tanba, daudaun ne’e volume publikasaun informasaun ho imajen falsu barak akontese iha mídia sosiál, entaun importante jornalista sira presiza hatene,” nia dehan.

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here