Vise-Ministru Administrasaun Estatál, Lino de Jesus Torrezão, konvoka sorumutuk ho Autoridade lokál munisípiu Baucau, iha CCB, segunda (27/09). Imajen TATOLI/Natalino Belo

BAUCAU, 27 setembru 2021 (TATOLI)—Vise-Ministru Administrasaun Estatál (MAE), Lino de Jesus Torrezão, liuhosi enkontru ho líder komunitáriu sira, husu atu serbisu másimu mobiliza komunidade partisipa iha kampaña vasina.

“Daudaun halo ona planu kiik atu kada suku tenke iha ninia alvu, tanba ne’e ha’u fó orden ba xefe suku sira atu serbisu, mobiliza, sensibiliza no organiza atu komunidade bele ba sentru saúde atu vasina,” Vise MAE hateten iha Sentru Konvensaun Baucau (CCB, sigla portugés) segunda ne’e.

Aleinde ne’e, objetivu hosi sorumutuk entre Vise-Ministru no lider lokál sira, atu halo avaliasaun ba kampaña vasinasaun dahuluk ne’ebé realiza antes ne’e, liuliu progresu ba doze dahuluk vasina.

“Ha’u ohin mai atu haree nia persentajen no progresu to’o iha ne’ebé ona, tanba ne’e liuhosi halo avaliasaun ne’e hanesan instrumentu ida, atu nune’e sai sasukat ba serbisu sira ne’ebé hala’o,” governante ne’e akresenta.

Tuir planu, membru Governu haat sei destaka iha Baucau iha loron 30 setembru hodi sensibiliza no enkoraja komunidade partisipa másimu iha kampaña vasina.

“Fó apelu ba komunidade sira atu partisipa vasina, labele rona rumores ne’ebé espalla iha rede sosiál tanba ema sira ne’ebé lansa informasaun ne’e la’ós espesialista ba saúde,” Vise-Ministru fó hanoin.

Iha fatin hanesan, Xefe suku Fatulia, postu administrativu Venilale, munisípiu Baucau, Angelino Moisés Pereira, hateten, atu salva-an hosi ameasa COVID-19 tenki partisipa iha kampaña vasinasaun.

Tuir dadus suku Fatulia iha abitante 600 resin mak vasina ona doze dahuluk no sei hela na’in-900 mak iha ona lista suku atu tuir kampaña vasinasaun.

“Ho alvu ne’ebé iha totál 1.500 resin, ami koko atubele tuir vasina hotu no ami deteta ona na’in-900 mak seidauk vasina,” Angelino hateten.

Tuir dadus nasionál, totál komunidade ne’ebé vasina doze dahuluk iha Baucau hamutuk 54,2 %, ne’ebé persentajen ne’e okupa fatin dahaat hafoin Dili, Oé-cuse no Viqueque.

Munisípiu Baucau iha abitante elejível hamutuk 72.000 resin (idade 18 ba leten) mak sei vasina, balun vasina ona no daudaun ne’e hela de’it 33.000 mak sei tuir kampaña vasinasaun.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here