Ema na’in 117, kompostu hosi feto 23 no mane 94 ne’ebé Polísia Nasionál Timor-Leste (PNTL), detein iha Manleuna, tanba deskonfia hanesan membru Grupu Arte Marsiál (GAM), ne’ebé kontra regra konfinamentu domisiliáriu jerál, iha Dili, tersa (07/09/21). Imajen Tatoli/Francisco Sony.

DILI, 27 setembru 2021 (TATOLI)—Tribunál Distritál Dili (TDD), aplika ona pena multa ba arguidu no arguida hamutuk na’in 117, nu’udár membru Grupu Arte Marsiál (GAM), tanba faktu provadu pratika krime dezobediénsia.

“Tribunál aplika tiha ona pena multa kada ema selu $15 no laiha kustu judisiáriu,” Advogadu, Sérgio Gama Lobo da Silva Junior, hateten ba jornalista iha TDD, Mandarin, segunda ne’e.

Notísia relevante:PNTL detein membru Grupu Arte Marsiál 117 iha Manleuana

Aliénde, Tribunál aplika mós pena substituisaun, bainhira arguidu-sira la kumpre pena multa durante prazu loron 15 maka sei kumpre pena efetivu.

Antes ne’e, arguidu sira hetan detensaun hosi Polísia Nasionál Timor-Leste (PNTL), munisípiu Dili, iha  08 setembru madrugada, iha Maneuala, tanba hala’o atividade Arte Marsiál, hodi halibur-malu ema barak liu na’in-sanulu iha implementasaun konfinamentu domisiliáriu jerál iha Dili.

Ministéiru Públiku akuza ho  krime dezobediénsia ne’ebé previstu iha artigu 244, númeru 1, iha kódigu penál.

Iha artigu ne’e deskreve ema ne’ebé la halo tuir nafatin órden ka mandadu lejítimu komunikadu regularmente, ne’ebé autoridade ka funsionáriu kompetente fó, sei hetan prizaun tinan tolu ka multa.

Prosesu audiénsia, prezide hosi juiz singular, Afonso Carmona, Ministériu Públiku reprezenta hosi prokuradór no arguido-sira hetan asisténsia legál hosi advogadu privadu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here