Sekretária Estadu Igualdade no Inklusaun, Maria Jose da Fonseca Monteiro de Jesus. Imajen Tatoli/ Egas Cristovão

DILI,27 setembru 2021 (TATOLI)-Sekretaria Estadu Igualdade no Inkluzaun (SEII), segunda ne’e, realiza worshop nasionál ho tema ‘Hametin partisipasaun feto iha prosesu eleisaun’ liliu atu kandidata feto sira ba Prezidente Repúblika no mós Deputada  iha uma fukun parlamentu nasionál.

Sekretaria Estadu Igualdade no Inkluzaun, Maria José da Fonseca Monteiro de Jesus, hateten feto mós iha papel importante hodi kontribui ba prosesu dezenvolvimentu nasionál nasaun nian.

Notísia Relevante :Armanda Berta ofisialmente deklara kandidata an ba Prezidente Repúblika

“Ohin ita halo abertura workshop iha nivél nasionál ida ne’e ita loke ona dalan ba preparativu ne’ebé hahú hosi nivél nasionál, munisípiu no to’o iha Rejiaun Administrativa Espesiál Oé-Cusse Ambeno (RAEOA) hodi prepara feto potensiál hakat ba iha hasoru eleisaun prezidensiál, lejislativa, suku nomós desentralizasaun ba iha eleisaun Munisipál ne’ebé sei akontese,” Governante ne’e hateten ba jornalista sira iha salaun Delta Nova Dili.

Daudaun ne’e iha ona feto potensiál sira hanesan atuál Ministra Solidaridade Sosiál no Inkluzaun (MSSI) Armanda Berta, deklara ona antes ne’e sei kandidata an ba Prezidente Repúblika iha eleisaun prezidensiál 2022.

Nia relata persentajen feto ne’ebé oras ne’e asume kargu polítika ne’e iha nasaun ne’e kiik liu tanba feto asume pasta Xefe Suku hamutuk ema na’in 21, Xefe Aldeia ema na’in 85, reprezentante joven feto iha suku 459, autoridade lokál feto na’in ida, feto sai deputada iha Parlamentu Nasionál foin pursentu 40, feto tuur iha estrutura governu 16%.

“Ita fiar katak ho servisu hamutuk ida ne’e ba oin feto sira kaer kargu iha polítika bele aumenta tan,” nia espera.

Nune’e, Diretora Ezekutiva Fundasaun Caucus Feto iha Polítika, Terezinha Maria Noronha hateten prosesu dezenvolvimentu demokrasia iha Timor-Leste, sistema ida ne’ebé nakloke  hodi fó oportunidade ba ema hotu atu partisipa iha prosesu dezenvolvimentu.

Tanba ne’e feto mós iha papel importante atu tuur iha kargu espesial sira, la’ós mane deit hodi foti desizaun.

“Ha’u husu ba joven feto foinsa’e iha mantenek labele ansi uluk forma família maibé uza matenek ne’ebé iha hodi kontribui ba indepedénsia ida ne’e , tanba ne’e agora ita kontinua nafatin prepara ita-nia joven feto sira nune’e aban bain-rua sai lideransa ne’ebé di’ak hodi kontribui ba ita-nia nasaun,” nia hateten.

Ikus liu, Xefe Suku Bemori, Cristalina de Oliveira konta tuir katak durante asume kargu nuudar lideransa komunitaria ne’e la’ós buat fasil maibé tenki aprende atu bele kompete ho mane sira.

“Durante ha’u-nia mandatu susesu ne’ebé iha ha’u-nia suku mak servisu hamutuk ho Governu liuhosi programa PNDS hadi’a ami-nia estrada sai di’ak, no ha’u-nia esforsu rasik hamutuk ho komunidade ami halo ponte kiik ida iha suku Bemori ne’e hatudu katak ami feto sira iha boa vontade hodi ukun,” nia dehan.

Entretantu, worshop nasionál ne’e organiza husi Sekretaria Estadu Igualdade no Inkluzaun (SEII) no hetan partisipasaun husi Grupu Mulher Parlamentár Timor-Leste (GMPTL), Fundasaun Caucus Feto iha Polítika, Moveimentu Feto Foinsa’e Timor-Leste ((MFF-TL), Patria no Plan Internsionál.

Notísia Relevante :SEII kontinua promove feto partisipa iha setór oioin

Jornalista : Arminda Fonseca

Editór: Agapito dos Santos

HAKEREK NO HATÁN

Please enter your comment!
Please enter your name here