Sekretáriu Estadu Meiu Ambiente, halo sensibilizasaun kona-bá dekretu lei ambientál ba entidade relevante, iha postu administrativu Maliana, munisipiu Bobonaro, segunda (27/09/21). Imajen Tatoli/Sérgio da Cruz.

BOBONARO, 27 setembru (TATOLI)—Sekretáriu Estadu Meiu Ambiente (SEA), sensibiliza lei ambientál ba administradór postu administrativu, autoridade lokál no entidade relavante-sira iha munisípiu Bobonaro.

Lei ambientál ne’ebe sensibiliza ba entidade relevante-sira kompostu hosi dekretu lei númeru 26/2011 kona-ba lei bazika ambientál, dekretu lei númeru 5/2011 kona-bá lisensiamentu ambientál, dekretu lei númeru 36/212 kona-bá kontrolu no importasaun ho esportasaun, dekretu lei númeru 6/2020 rejime jurídiku protesaun no konservasaun biodiversidade, inklui dekretu lei númeru 37/2020 kona-bá importasaun produsaun saku ho objetu plástiku.

Notísia relevante:Governu planeia kria zona espesiál protesaun ambientál no ekolójika

Xefe Gabinete Jurídiku no Protesaun Ambientál, SEA, Francisco Poto, hateten sensibilizasaun ba dekretu lei hirak-ne’e, atu fó-hanoin ba autoridade lokál-sira, oinsa implementa iha baze, bele apar ho lei ambientál ne’ebé vigora iha Timor-Leste (TL).

“Dekretu lei ne’e sai hanesan baze ba autoridade lokál sira atu implementa iha suku, tanba sira mak  besik liu komunidade, oinsa fó-hanoin, bainhira hala’o atividades labele kontra lei ne’ebé  fó impaktu ba ambiente,” nia hateten ba jornalista iha salaun administrasaun, segunda ne’e.

Iha implementasaun, ba oin bainhira komunidade ka instituisaun Estadu hala’o atividade ne’ebé liga ho ambiente, hanesan tesi ai, fokit plantasaun, presiza hetan lisensa ambientál, bainhira laiha lisensa sei konsidera ilegál.

Lei ne’e hateten, ema ne’ebé tesi ai arbiru, fokit plantasaun iha área protezida no faan animál arbiru kontra órden grave, bele kondena ho koima $1.000 to’o $15.000, ba pesoa ka singulár $1.000 to’o $30.000.

Iha Fatin hanesan, Xefe suku Odomau, Cirilio Sirio Bere Moniz, konsidera lei ne’e importante tebes atu regula komunidade ne’ebé estraga ambiente.

Autoridade lokál ne’e sujere ba SEA, atu sensibiliza komunidade kona-bá lei ne’e to’o nível aldeia, liu-liu halo konsultasaun ho lian-na’in suku hitu iha postu administrativu Maliana, tanba lei ne’e iha artigu balun kontradís ho kultura no regulamentu suku nian.

“Iha ami-nia suku no iha suku viziñu balun, atividade kulturál balun kada tinan sempre sunu rai, estraga ai-horis barak, tanba ne’e Governu presija ba to’o aldeia atu bele apar ho kultura,” nia sujere.

Sensibilizasaun ne’e partisipa hosi autoridade lokal suku hitu no xefe aldeia sira iha postu administrativu Maliana, Polisia Eskuadra Maliana, Guarda florestál no Bombeiru munisípiu Bobonaro.

Tuir planu, atividade ne’e sei hala’o mós iha postu administrativu seluk iha munisípiu Bobonaro, inklui iha munisipiu 11 no RAEOA.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here