Edifísiu foun BNCTL sukursál Mandarin, Dili. Imajen TATOLI/Francisco Sony

DILI, 27 setembru 2021 (TATOLI)—Banku Nasionál Komérsiu Timor-Leste (BNCTL, sigla portugés) reabilita edifísiu sukursál Mandarin, Dili, ho kustu totál millaun $1,47, ho durasaun serbisu tinan-ida, hahú juñu 2020 no konklui iha juñu 2021.

Tanba ne’e, iha loron sábadu (24/09), inaugura edísiu foun BNCTL ba dala-haat iha Mandarin.

“Maski hasoru dezafiu no atrazu tanba serka sanitária no konfinamentu obrigatóriu, maibé konstrusaun lori tempu tinan-ida de’it,” refere nota ne’ebé Agência TATOLI asesu, iha segunda ne’e.

Edifísiu foun BNCTL sukursál Mandarin, Dili. Imajen TATOLI/Francisco Sony

Edifísiu foun Banku Nasionál ne’e sei permite asesu no atendimentu servisu bankáriu iha ambiente foun hodi kliente sira bele sente konfortável no kontente bainhira mai vizita edifísiu.

“Espera ho edifísiu foun ne’e, BNCTL bele mellora liután atendimentu oioin no sai nu’udar ​kontribuisaun ​​ba dezenvolvimentu nasionál iha área infraestrutura,” nota BNCTL subliña.

Banku sente onradu ba dezenvolvimentu sira inklui dijitaliza ona sistema atendimentu ne’ebé halo fazeadamente hodi atinje objetivu, mellora atendimentu ba kliente ho lalais, seguru no sai banku ne’ebé hetan fiar no halo atendimentu efisiente no efetivu liu, hanesan ajente Estadu atu kontribui ba kreximentu ekonomia no dezenvolvimentu ​nasionál.

Edifísiu foun Mandarin ne’e inaugura ho prezensa Asionista únika Estadu ba BNCTL no atuál Ministru Koordenadór Asuntu Ekonómiku (MKAE), Joaquim Amaral, Governadór Banku Sentrál Timor-Leste (BCTL, sigla portugés) Abraão de Vasconselos, akompaña hosi orgaun sosiál ho komisaun interna BNCTL, Autoridade Nasionál, reprezentante kliente, auoridade seguransa, inklui funsionáriu BNCTL hosi sede, no sukursál hotu.

Iha inaugurasaun edifísiu foun ne’e, BNCTL lansa tan servisu internet banking ba kliente sira.

“Utiliza teknolojia internet sai hanesan mídia ida hodi bele halo tranzasaun no hetan informasaun seluk, liuhosi website banku nian, ne’ebé atividade ne’e utiliza rede internet sai hanesan intermediáriu ka ligasaun entre kliente ho banku sira sein prezensa kliente iha edifísiu banku,” nota hosi Banku esplika.

Aleinde ne’e, internet banking oferese ba kliente individuál no kompañia sira hodi bele asesu servisu hanesan konsulta saldo, transferénsia fundu, top up, empréstimu, estratu bankária, painel IB, pagamentu massa ka bulk payment, no lista.

Biban ne’e, lansa mós ibanking no marsa BNCTL, ne’ebé marsa ne’e hakerek hosi kompozitór Domingos Freitas Savio, ho liafuan sira ne’e la sees hosi vizaun, misaun, valór no lema prinsipál BNCTL ‘moris ba imi, buras ho imi no sub lema ‘serbí diferente no sai  diferente’.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here