Administradór postu Venilale, Miguel Mendes Manso Guterres. Imajen TATOLI/Natalino Belo

BAUCAU, 27 setembru 2021 (TATOLI)–Administradór postu Venilale, munisípiu Baucau, Miguel Mendes Manso Guterres, hateten, postu ne’e sei hahú implementa programa mão de obra faze dahuluk iha fulan-outubru.

“Programa mão de obra, kompañia no grupu sira asina ona kontratu no tuir planu sei implementa iha loron 01 outubru ho totál orsamentu $25.000 ba faze dahuluk no faze daruak $25.000, ho totál alokasaun $50.000,” Administradór hateten iha Sentru Konvensaun Baucau (CCB, sigla portugés), segunda ne’e.

Atividade ne’ebé sei implementa kompostu hosi limpeza jerál, manutensaun estrada, kuda ai-oan, limpeza merkadu, kria kondisaun ba fatin turizmu iha lagoa Uagabuiloi no reabilitasaun rezidénsia uma antigu iha Venilale villa.

Notísia relevante: Administrasaun Baucau villa hein aprovasaun orsamentu programa mão de obra

Fatin implentasaun iha faze dahuluk mak suku Fatulia ne’ebé sei destaka grupu rua, Uailaha grupu tolu no Baduho’o grupu ida, ne’ebé sei implementa atividade hanesan limpeza jerál, manutensaun estrada no limpeza edifísiu postu administrasaun.

“Faze dahuluk sei hahú tinan ne’e no tuir planu sei termina iha fulan-dezembru, karik lais liu iha novembru,” Miguel hateten.

Tuir Administradór, bainhira implementasaun faze dahuluk mak iha progresu di’ak mak sei kontinua kedas ho faze daruak iha suku lima hanesan Uatuhaco, Baduho’o, Badumori, Uma-ana Ulo no Uma-ana Iku.

“Suku Bahamori sei implementa atividade no kria kondisaun ba turizmu komunitáriu iha lagoa Uagabuiloi,” nia akresenta.

Tuir matadalan, orsamentu hamutuk $501.000 ba leten sei liuhosi kuotasaun ba kompañia sira, enkuantu $500.000 ba kraik kabe ba kompeténsia Administradór atu ajudika direita ba grupu komunitáriu iha fatin implementasaun atividade.

Atividade ne’ebé sei realiza mak kria kondisaun ba fatin turizmu iha lagoa Uagabuiloi, manutensaun estrada iha Venilale villa no reabilitasaun uma rezidénsia portugés ho kustu $15.001, ne’ebé sei toma konta hosi kompaña Ocadaba.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here