Profisionál saúde-sira iha HNGV no hosi sentru saúde-sira iha munisípiu Dili, hamutuk na’in 50, partisipa treinamentu kona-bá jestaun kazu COVID-19, segunda (27/09/21). Imajen Tatoli/Felicidade Ximenes.

DILI, 27 setembru 2021 (TATOLI)—Ministériu Saúde (MS) hamutuk Ospitál Nasionál Guido Valadares (HNGV sígla portugés), hala’o oferese treinamentu ba pesoál saúde-sira kona-bá jestaun kazu COVID-19, nune’e bele hala’o atendimentu di’ak liu tán iha izolamentu no Sala Unidade Kuidade Intensivu (ICU sígla inglés).

Eventu ne’e hanesan treinamentu klíniku no HNGV mak organiza atu bele hasa’e nível prontidaun fasilidade izolamentu no ICU ligadu ho tratamentu  COVID-19.

Notísia relevante:COVID-19, óbitu rua no rekuperadu 103

“Treinamentu ne’e importante tebes iha situasaun agora atu bele eleva kapsidade ita-nia médiku-sira tanba nessesita duni ba médiku-sira atu halo tratamentu ho di’ak, no bele redús mortalidade iha fasilidade izolamentu no iha ICU.  Nune’e treinamentu ne’e konsetra liu ba tratamentu uza oksijéniu,” Diretór Jerál Serbisu Korporativa, Ministériu Saúde, Marcelo Amaral, hateten ba jornalista-sira iha  salaun enkontru, HNGV segunda ne’e.

Tarjetu  ba treinamentu  ne’e, liuliu ba médiku-sira ne’ebé seidauk tuir treinamentu no médiku espesialista-sira, atu bele eleva sira-nia kapasidade kléniku atu bele atende pasiente di’ak liu tán.

Iha fatin hanesan Diretór Kliniku HNGV, Marcelino Correia, hateten treinamentu ne’e fó ba profisionál saúde-sira iha HNGV no  hosi sentru saúde-sira iha munisípiu Dili, hamutuk na’in 50.

Formasaun ne’e sei hala’o durante loron lima, hahú hosi segunda  to’o sesta, tanba iha tópiku lima mak sie fó ba sira mak hanesan medisina interna, anestesia, pediatria, ICU no mos IPC.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here