Membru foun F-FDTL aprezenta an iha Kuartél Jenerál Fatuhada, molok hakat ba integra an iha Sentru Formasaun no Treinu Metinaro, segunda (27/09). Imajen Tatoli/Francisco Sony.

DILI, 27 setembru 2021 (TATOLI)—Membru foun FALINTIL Forsa Defeza Timor-Leste (F-FDTL), hamutuk  600, kompostu hosi feto 11%  no mane 89%, inkorpora ona ba Komponente Formasaun no Treinu Metinaro, hodi submete ba formasaun militár durante fulan neen, atu bele hala’o kna’ar iha instituisaun defeza ne’e.

“Parabéns ba imi bele liu teste no agora hahú inkorpora sai membru F-FDTL,” Xefe Estadu Maiór  F-FDTL, Tenente Jenerál, Lere Anan Timur, hateten iha diskursu abertura integrasaun kadete foun sira iha Kuartél Jenerál, Fatuhada, segunda ne’e.

Notísia relevante:Membru foun F-FDTL 357 hosi munisípiu neen aprezenta an

Mensajen hosi Lere Anan Timur katak, sai militár la’ós funsionáriu públiku, maibé  profisaun todan no difísil atu serbí nasaun no povu.

Tanba ne’e, nia enkoraza katak, tenke prontu atu ultrapasa situasaun foun nu’udár  joven Timoroan, hodi tuir nafatin  prinsípiu luta na’in-sira nian liu hosi funu naruk, ne’ebé memória sei kapta metin.

“Iha sentru formasaun sei hasoru situasaun difisíl tanba intrutór-sira sei koko imi-nia  fíziku, mentál, sakrifísiu no pasiénsia, tanba militár prontu bainhira iha ameasa funu ruma tenke sai lutu ba nasaun,” nia hameno.

Lere Anan Timur, agradese ba inan-aman sira ne’ebé oferese oan sira atu sai lutu ba nasaun, nune’e husu atu suporta nafatin hodi bele sai militár ida ne’ebé hatene moris ho disiplina loloos.

Hahú ohin ba oin sai membru F-FDTL hanesan Timoroan laiha loro-monu no loro-sa’e, tenke leál no laran mós nafatin ba instituisaun.

Tanba ne’e, kadete foun balun nu’udár membru arte marsiál antes ne’e iha faze rekrutamentu deklara ona ba komandu ho sinseru iha formuláriu atu sai hosi arte marsiál.

“Hahú ohin laiha arte marsiál, loron ida imi sei hatama atributu ba instituisaun antes halo juramentu, hodi prontu fó vida ba nasaun,” Lere deklara.

Membru foun F-FDTL hamutuk na’in-ualu mak hetan substituisaun, tanba hanesan membru arte marsiál  ne’ebé la deklara an, iha problema pasadu no la marka prezensa inklui kazada maibé la deklara an.

Notísia relevante:Komandu husu membru foun F-FDTL 600 aprezenta an

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here