Imajen Goolge.

DILI, 27 setembru 2021 (TATOLI) – Mauputar FC “liki” Kuda Ulun FC 8-2 iha jornada 10 Prá liga Futsal Timor-Leste ne’ebé organiza hosi Asosiasaun Futsal Timor-Leste (AFTL).

Ekipa rua ne’ebé hala’o jogu, iha segunda kalan ne’e, iha salaun futsal FALINTIL-Forsa Defeza Timor-Leste (F-FDTL) ho situasaun ne’ebé hakmatek no laiha animasaun husi adeptu ida-idak nian tanba tenke kumpre protokolu Organizasaun Mundiál Saúde no Ministériu Saúde nian atu prevene propagasaun covid-19.

Iha jogu ne’e, vitória monu ba ekipa Mauputar tanba equipa ne’e forte liu kompara ho Kuda Ulun. Iha minutu dahuluk ekipa rua lansa kontra-atake, maibé Kuda Ulun difísil sobu defeza vensedór nian.

Nune’e iha minutu dasanulu, jogadór Miguel Lay hatuur golu dahuluk ba guarda Kuda Ulun 1-0. Jogu sai manas liután, maibé ekipa Mauputar nafatin domina bola no iha minutu 12 jogadór Ruben Faria marka golu daruak nian no rezultadu sai ba 2-0.

Mauputar kontinua hatudu performa ne’ebé brillante liu iha kampu laran, nune’e iha minutu 18 jogadór Davidson Henrique hetan oportunidade di’ak hodi lansa tan golu ba guarda rede Kuda Ulun no iha minutu 19 jogadór Domingos Esteve prodús tan golu hodi hatur rezultadu provizóriu ba 4-0.

Hafoin jogu namanas, ekipa rua tenke intervallu tiha minutu balun depois kontinua, más Kuda Ulun nein ameasa guarda rede Mauputar no la marka tan golu ruma iha primeira parte.

Hakat ba segunda parte, jogu nafatin manas, maibé Mauputar nafatin domina bola no sorte di’ak monu tan ba jogadór Mario Moniz iha minutu 27 hodi “fura” tan rede Kuda Ulun hodi halo rezultadu sai dook liután.

Iha minutu 31 no 38 Miguel Lay selebra tan golu hodi hasa’e tan rezultadu ne’ebé Kuda  Ulun susar atu duni tuir.

Maski seidauk marka golu ida, maibé Kuda Ulun esforsu tebes no ikus mai iha minutu 38 no 39 jogadór Miguel Barreto ho Miguel Amaral konsege fera “manu-tolun” ne’ebé tomak hela hodi halo rezultadu sai 7-2.

Iha minutu ikus besik jogu atu termina, Kuda Ulun tenta nafatin atu prienxe golu, maibé labele to’o mehi ne’ebé sira hakarak atu halo empata ou manán Mauputar.

Ruben Faria, jogadór husi ekipa manán-na’in marka tan golu ida hodi halo rezultadu metin iha 8-2 no jogu akaba hodi fó vitória ba Mauputar.

Jornalista: Hrotencio Sanchez

Editora: Maria Auxiliadora

HAKEREK NO HATÁN

Please enter your comment!
Please enter your name here