Osan Dollar Amerikanu. Imajen/Espesiál

DILI, 27 setembru 2021 (TATOLI)—Governu aprova ona tetu agregadu no dezagregadu ba  Orsamentu Jerál Estadu (OJE) 2022 ho montante totál biliaun $1,675, ne’ebé persentajen boot liu ba setór produtivu.

“Alokasaun orsamentu tinan 2022 tuir prioridades nasionál 6 a’as liu mak iha setór produtivu hanesan agrikultura no turizmu, ambiente no konektividade ho alokasaun 27%, abitasaun no inkluzaun sosiál 22%, boa governasaun 12%, dezenvolvimentu kapitál umanu 10%, dezenvolvimentu rurál 3% no dezenvolvimentu setór privadu 0,5%, funsionamentu mákina Estadu 18% no atividade seluk 8%,” refere nota ne’ebé Agência TATOLI simu, segunda ne’e.

Tetu ne’ebé iha sei uza hodi finansia programa 43 iha perímetru OJE 2022 liuhosi prioridade nasionál neen hanesan dezenvolvimentu kapitál umanu (edukasaun, formasaun profisionál no saúde), abitasaun no inkluzaun sosiál, setór produtivu (agrikultura no turizmu), ambiente no konetividade, dezenvolvimentu setór privadu no kooperativa, dezenvolvimentu rurál, no boa governasaun, ho objetivu atu atinje dezenvolvimentu ne’ebé kualidade ho kreximentu ekonómiku ne’ebé inkluzivu no sustentável.

“Alokasaun orsamentu aprovadu ba OJE 2022 tuir klasifikasaun ekonómiku a’as liu mak iha transferénsia públika ho montante millaun $565,9, tuir kedan ho bens no servisu millaun $449,8, kapitál dezenvolvimentu ne’ebé bele kria postu traballu no jere empregu rai-laran hetan alokasaun millaun $401,7, saláriu no vensimentu millaun $233 no kapitál menór millaun $24,4”, nota ne’e esplika.

Governu sei aprezenta Proposta Projetu Lei (PPL) ba Parlamentu Nasionál (PN) iha loron 15 outubro 2021, enkuantu Ministériu Finansa sei hahú prepara Livru I to’o Livru VI Proposta Lei OJE 2022 inklui dokumentu adisionál sira.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here