Padre Pároku Sagrada Coração de Jesus, fó bensaun ba mini guest house, iha Villa nova, Baucau, segunda (27/09). Imajen TATOLI/Natalino Belo

BAUCAU, 27 setembru 2021 (TATOLI)–Gabinete Apoiu Sosiedade Sivil (GASC, sigla portugés), ajuda fundu ba Cruz Vermelha de Timor-Leste (CVTL) hodi harii mini guest house.

Iha seremónia inaugurasaun mini guest house ne’e, Koordenadór GASC, Filipe da Costa, hateten, inisiativa ne’e hanesan parte ida atu hasa’e rendimentu liuhosi programa ‘Buka Rasik Osan’ (BRO).

“Ami apoia programa BRO hodi buka fundu ba CVTL, ne’ebé sei finansia fali programa umanitária no atividade sosiál seluk ne’ebé hala’o iha komunidade nia le’et,” Koordenadór GASC dehan iha seremónia inaugurasaun, iha CVTL filiál Baucau, Villa nova, segunda ne’e.

Nune’e, Filipe da Costa  husu ajente Estadu sira bainhira halo viajen ba Baucau, bele deskansa iha fatin ne’e.

“Hasai netik osan, soe hela iha ne’e atu ita-nia voluntáriu sira uza hodi hala’o asaun umanitária, tanba sira la’ós atu halo negósiu iha ne’e,” nia akresenta.

Kada tinan GAGC sempre aloka orsamentu ba organizasaun naun governamentál sira hanesan CVTL, klínika Bairro Pité, grupu ortikultura sira iha munisípiu hotu, inklui kanaliza bee-mos ba komunidade.

“Ha’u espera tinan oin Parlamentu Nasionál aprova nafatin orsamentu hodi nune’e ita-nia sosiedade sivil sira bele kompete,” nia hatutan.

Iha fatin hanesan, Koordenadór CVTL Filiál Baucau, Cipriano Magno, hateten, totál orsamentu ne’ebé GASC oferese ba konstrusaun guest house hamutuk $10.000.

Hosi fundu ne’e, utiliza ba prodúz kartaun membru no seluk hodi konstrui guest house nu’udar fatin deskansa ba bainaka sira, ho kustu $7 kalan ida.

“Dala barak ami iha atividade formasaun no treinadór sira hosi nasionál sempre ba aluga otél ne’ebé ho folin karun, entaun ami harii uma ida ne’e atu osan tama fali mai BRO filiál nian,” Cipriano haktuir.

Serimónia inaugurasaun ne’e partisipa hosi Reprezentante Prezidente Autoridade Munisiál (PAM), Segundu Komadante Polísia Nasionál Timor-Leste (PNTL) Baucau, no Padre Pároku Sagrada Coração de Jesus.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here