Eis Prezidente Repúblika, José Ramos Horta. Imajen TATOLI/Egas Cristóvão.

DILI, 27 setembru 2021 (TATOLI)–Eis Prezidente Repúblika, José Ramos Horta, hateten, bainhira atu dezenvolve turizmu rurál, husu atu Governu liuhosi Ministériu Turizmu, Komérsiu no Indústria (MTKI) bele kapasita komunidade lokál halo atendimentu ba ema.

“Ita-nia ema sira tenke iha formasaun didi’ak atu hatene simu ema, la’ós ita ba restaurante ida iha Dili, atende ba ita ho oin suar,” Horta dehan bainhira partisipa iha semináriu ho tema ‘turizmu tranformativu, sustentável no inkluzivu’ hodi komemora loron mundiál turizmu, iha salaun Plaza IOB, segunda ne’e.

Notísia relevante: MTKI-IOB organiza semináriu turizmu transformativu sustentável no inkluzivu

Horta defende turizmu rurál, liuliu ba dezenvolvimentu home stay, ne’ebé kuandu ema la’o ba fatin ida sempre buka fatin hodi deskansa.

“Imajina família ida halo uma oan, Governu bele fó apoiu kréditu hodi sira bele harii uma ho kuartu ida ka rua, nune’e karik vizitante sira ba vizita fatin turizmu sira, bele deskansa iha fatin ne’e no fó rendimentu ba komunidade,” nia akresenta.

Hatan ba kestaun ne’e, Vise-Ministra Turizmu Komunitáriu no Kulturál, Inâcia da Conceição Teixeira, konsidera kestaun atendimentu iha fatin turizmu importante, tanba ne’e parte ministériu sei buka meiu hodi bele kapasita ema ne’ebé atu destaka iha fatin turizmu.

“Ami daudaun ne’e kontinua foka hodi fó kapasitasaun ba ita-nian ema sira, tanba atu rekupera turizmu iha situasaun COVID-19, presiza ema maka sai sentru ba dezenvolvimentu. Tanba ne’e, ami sei fó apoiu formasaun ba ita-nia ema sira iha área jestaun no otelaria, atu hatene oinsá atu halo atendimentu,” nia dehan.

Antes ne’e Ministériu, Turizmu, Komérsiu no Indústria (MTKI) fó ona apoiu subvensaun ba grupu lima hosi suku lima hodi implementa programa pilotu dezenvolve turizmu komunitáriu.

Notísia relevante: MTKI asina akordu subvensaun ho grupu traballu dezenvolve turizmu komunitáriu

“Ida-ne’e nu’udar programa Governu atu empodera komunidade sira iha baze, nune’e sira bele sente dezenvolvimentu la’ós de’it iha sentrál, maibé hosi mós baze,” nia akresenta.

Suku lima ne’ebé hetan apoiu hosi MTKI ba programa pilotu dezenvolvimentu maka suku Ualili iha Baucau, suku Uaimoritula iha Viqueque, suku Maubise Villa iha Ainaro, suku Nunumoge iha Ainaro no suku Seloi iha Aileu.

Jornalista : Natalino Costa

Editora     : Julia Chatarina

HAKEREK NO HATÁN

Please enter your comment!
Please enter your name here