Komunidade sira iha suku Usitasae loke estrada foun hosi aldeia Buqui to’o mota Noe-Papa. Imajen/Mídia Sekretáriu Administrasaun.

OÉ-CUSSE, 27 setembru 2021 (TATOLI)—Sekretáriu Rejionál Asuntu Administrasaun, Martinho Abani Elu, hateten autoridade RAEOA liuhosi liuhosi programa Food for Work sei motiva komunidade atu hadi’a rasik sira-nia estrada iha nivél suku, aldeia to’o bairru izoladu sira, nune’e bele evita akontese dezastre no fasilita sira lori produtu lokál ba faan iha merkadu.

Notísia Relevante: Autoridade RAEOA distribui foos saka-138 ba komunidade Usapibela

“Programa Food for Work autoridade hala’o ona iha baze, iha sub-rejiaun liu-liu bairru izoladu, komunidade sira loke estrada foun no hadi’a rasik estrada, hamoos baleta sira nu’udar preparasaun bainira udan atu monu rai. Tanba ne’e, mak autoridade motiva komunidade atu kuidadu no hadi’a rasik estrada,” Sekretáriu Rejionál Asuntu Administrasaun ne’e informa ba Agênsia Tatoli iha Numbei, Oé-Cusse, segunda ne’e.

Nia informa, iha sub-rejiaun Passabe liu-liu iha suku Abani, komunidade loke estrada foun ba bairru izoladu hodi bele asesu ba estrada boot no halo normalizasuan estrada ne’ebé risku ba dezastre naturál.

Iha sub-rejiaun Oésilo, suku Usitasa’e, komunidade loke estrada foun iha aldeia Buqui iha mota Noe-Papa ho distansia kilómetru rua (2), no hadi’a estrada hodi taka estrada kuak no hamoos balleta sira.

Iha sub-rejiaun Pante Makasar, iha suku Lalisuk, aldeia Usapibela, Noapai, Noe-Ninen, Manuimpena no Padiae sentrál, komunidade sira halo limpeza jerál hodi hamoos baleta, hadi’a estrada no taka estrada kuak.

Nune’e mós iha suku Costa, iha aldeia Lakufoan, suku Naimeco, komunidade hadi’a estrada hodi taka estrada no hamoos baleta sira no iha suku Lifau mós komunidade hadi’a rasik estrada.

Iha sub-rejiaun Nitibe, komunidade ho insisitaiva hadi’a rasik estrada iha suku Ban-Afi no komunidade balun loke estrada foun no balu hadi’a estrada hodi taka de’it estrada kuak.

Inisiativa ida-ne’e mai hosi autoridade RAEOA hodi informa ba autoridade lokál sira iha sub-rejiaun haat atu submete proposta, tanba bainhira finaliza programa hadi’a rasik estrada ne’e autoridade RAEOA sei apoiu foos saka ida ba komunidade kada uma kain ida.

“Ha’u espera, iha tempu badak, suku sira seluk bele submete ona sira-nia proposta tanba daudaun ne’e hela suku 10 mak seidauk hatama pedidu ba apoiu ai-han ninian liuhosi programa food for work ne’e,” nia dehan.

Xefe suku Usitasa’e, Tomas Ulan Colo, agradese ba autoridade RAEOA tanba liuhosi programa Food for Work bele enkoraja komunidade atu hadi’a rasik sira-nia estrada.

“Ha’u-nia suku loke estrada foun ramata ona iha aldeia Buqui kilometru-rua, Komunidade mós simu ona apoiu. Iha aldeia Pune, komunidade hadi’a rasik estrada hosi Mercadu Pune to’o bairru Nakome kilómetru neen (6) no komunidade mós simu ona apoiu ai-han. Iha aldeia Sifin mós, kominidade hadi’a ona estrada kilómetru rua,” nia dehan.

Jornalista : Abílio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here