Jogu entre ekipa S’Amuser kontra Academica FC, iha kampu FFTL, domingu (26/09). Imajen/Liga Timorense de Futebol Feminino

DILI, 26 setembru 2021 (TATOLI)–Liga Feto Timor (LFT) ne’ebé organiza hosi Federasaun Futeból Timor–Leste (FFTL), iha domingu lorokaik ne’e, iha kampu FFTL, realiza jogu entre ekipa S’Amuser kontra Academica FC.

Iha jogu ne’e, Jogadora hosi S’Amuser Dolores da Silva, sai hatrick hodi halakon adversáriu Academica ho rezultadu 3:0.

Iha jogu primeira parte, ekipa rua hahú lansa kontra atake ba malu tuir tékniku ida-idak nian, ne’ebé Academica FC joga ho tékniku defensivu tanba laiha kbiit halo jogu ofensivu, tanba defeza S’Amuser sempre halo mate jogu Academica nian.

S’Amuser jogu moris liu kompara ho Academica, nune’e iha minutu 10, Jogadora Dolores fura uluk rede adversáriu hodi hatúr rezultadu ba 1:0, ne’ebé golu ne’e hanesan golu úniku iha primeira parte nian, tanba durante minutu dahuluk, parte ekipa rua la halo tan golu ruma to’o termina minutu 45.

Hakat ba segunda parte, ekipa rua nafatin luta atu hetan vitória, maibé Academica nia luta hela de’it hanesan luta, tanba esforsu hotu ne’ebé halo la atinje objetivu.

Nune’e, iha minutu 75, Jogadora Dolores hetan tan oportunidade hodi fura rede Academica, hodi lori rezultadu ba 2:0.

Jogu sai manas liu tan ba ekipa rua, maibé Academica nafatin laiha sorte no Jogadora  Dolores hetan tan oportunidade ikus iha minutu 82 hodi fura rede Academica nian, nune’e dudu rezultadu tur metin kedan iha 3:0, to’o minutu termina laiha tan golu ruma mak akontese ba ekipa rua.

Jornalista : Hortencio Sanchez

Editora      : Julia Chatarina

HAKEREK NO HATÁN

Please enter your comment!
Please enter your name here