Ekipamentu ne’ebé pesoál saúde sira uza bainhira foti amostra ba teste COVID-19, kuarta (25/08). Imajen TATOLI/António Gonçalves

OÉ-CUSSE, 26 setembru 2021 (TATOLI)–Sentru informasaun COVID-19 iha Rejiaun Administrativa Espesiál Oé-cusse Ambeno (RAEOA), domingu ne’e, fó sai dadus atuál, ne’ebé rejista kazu pozitivu foun tolu, kazu ativu baixa hela iha sala izolamentu hamutuk 30 no rekupera ona hamutuk 280.

“Kazu pozitivu 30 daudaun ne’e baixa hela iha sala izolamentu Kiomaonteko ida, izolamentu Alfandega Mahata ida, izolamentu Klínika Kurasaun hamutuk hitu, izolamentu Kitahara Mahata hamutuk na’in-21,” Sekretáriu Rejionál Asuntu Saúde, Manuel da Costa, informa ba Agência TATOLI, via telefónika, domingu ne’e

Aliende ne’e, nia informa, daudaun ne’e pasajeiru sira ne’ebé tama rejiaun Oé-cusse hamutuk 41, kumpre hela kuarentena obrigatóriu, kompostu hosi kuarentena Sakato rua, uma Doutora Catarina Anunu iha ida, kuarentena Eskola ETARO Masin na’in-33, auto-kuarentena iha rezidénsia Mateus Sufa na’in-ida, auto-kuarentena Palaban na’in-ida, auto-kuarentena Verónika Oématan na’in-ida no auto-kuarentena Fulolo na’in-rua.

Notísia relevante: COVID-19: pozitivu hosi Dili hamutuk 27 no munisípiu seluk lima

Tuir dadus hosi loron 23 marsu 2020 to’o ohin lorom, totál dadus komulativu kazu konfirmadu hamutuk 311, hasai teste swab 308, númeru RDT swab 192, komulativu teste swab 3.622, komulativu rezultadu negativu 3.397.

Enkuantu, pasajeiru ne’ebé kumpre kuarentena obrigatóriu iha Oé-cusse 1.724, auto-kuarentena 305, ho totál hamutuk 2.029, pasa ona loron-14 hamutuk 1.943 no rejista óbitu ida.

Nune’e, Dirijente saúde ne’e apela ba komunidade sira iha RAEOA atu hakbesik-an ba fasilidade saúde ne’ebé besik, nune’e bele simu vasina hodi hamutuk prevene-an hosi moras COVID-19 iha Oé-cusse, no husu atu mantein regulamentu hosi Organizasaun Mundiál Saúde no Ministériu Saúde, ne’ebé orienta fase liman bebeik ho sabaun, kontinua uza máskara maski vasina kompletu ona.

Jornalista : Abílio Elo Nini
Editora      : Julia Chatarina

HAKEREK NO HATÁN

Please enter your comment!
Please enter your name here