Benifisiáriu UKL hosi suku Uma Quic, Bendita Amaral. Imajen TATOLI/Vitorino Lopes da Costa

VIQUEQUE, 26 Setembru 2021 (TATOLI)—Benifisiáriu Uma Kbiit Laek (UKL) hosi aldeia Ai-dak Bem, suku Uma Quic, postu Viqueque villa, munisípiu Viqueque, Bendita Amaral, agradese ba programa Governu.

“Ha’u agradese tebes ba ita-nia Governu tanba hanoin ona povu hodi konstrui uma ba ninia povu kbiit laek sira iha territóriu laran,” Benifisiáriu Bendita Amaral hateteten ba Agência TATOLI, iha aldeia Ai-dak Bem, domingu ne’e.

Nune’e, Bendita husu Governu atu kontinua programa UKL tanba Timor-Leste iha ema kbiit laek barak.

“Ha’u sente kontente tebes tanba ha’u mós hetan ona uma dignu ida ho kuartu rua sala rua. Maibé ha’u husu ba Governu hodi kontinua programa ne’e, atu ha’u-nia maluk sira ne’ebé seidauk hetan karik, sira mós bele hetan hotu uma ne’e,” nia akresenta.

Notísia relevante: Progresu konstrusaun UKL iha Viqueque atinje 52%

Iha sorin seluk, oan benefisiáriu UKL, Francisco Sores, agradese ba Governu ne’ebé hanoin ona ninia povu kbiit laek sira hodi oferse uma.

“Ami laiha buat ida atu fó ba Governu, maibé ami agradese ba ita-nia Governu ne’ebé hanoin ona oferese uma UKL ne’ebé dignu ba ami. Espera Governu nafatin hatutan programa ne’e no labele para iha ida-ne’e de’it,” nia dehan.

Governu aloka orsamentu millaun $25 ba konstrusaun UKL hamutuk 1.254 iha munisípiu 12 la inklui Rejiaun Administrativa Espesiál Oé-cusse Ambeno (RAEOA).

Benefisiáriu UKL iha munisípiu Aileu 99, Ainaro 62, Baucau 177, Bobonaro 150, Covalima 90, Dili 24 de’it tanba Postu Administrativu Ataúro ho Metinaro mak hetan Uma Kbiit Laek ne’e, Ermera 156, Lautém 102, Liquiçá 69, Manatuto 93, Manufahi 86 no Viqueque 108.

Uma Kbiit Laek hanesan programa VIII Governu Konstitusionál liuhosi Programa Nasionál Dezenvolvimentu Suku (PNDS) atu fó tratamentu dignu ba sidadaun.

Governu estabelese kritériu ba banefisáriu sira hanesan ema vunerável ka ema ne’ebé kbiit laek, idozu ona, kondisaun uma rezistente a’at no iha rendimentu mínimu, maibé mós tenke iha rai.

Jornalista : Vitorino Lopes da Costa

Editora      : Julia Chatarina

HAKEREK NO HATÁN

Please enter your comment!
Please enter your name here