Vasina iha sentru saude Viqueque, domingu (26/09). Imajen TATOLI/Vitorino Lopes da Costs

VIQUEQUE, 26 setembru 2021 (TATOLI)-Autoridade munisípiu Viqueque enkoraja komunidade Viqueque atu hakbesik-an ba fasilidade saúde hodi simu vasina.

“Ha’u husu ba komunidade parte suku Uma Quic no populasaun Viqueque sira simu vasina hodi haforsa ita-nia imunidade, atu kontra hasoru COVID-19 ne’ebé sei kontinua eziste. Ha’u haree komunidade suku Uma Quic ladún partisipa vasina. Tanba ne’e, ha’u husu simu vasina,” Administradór Viqueque, Januário Sores ‘Bolly’, hateten ba Agência TATOLI, iha Viqueque, domingu ne’e.

Tuir Autoridade, komunidade hosi suku Uma Quic rejista kazu pozitivu barak no bainhira pesoál saúde sira atu ba hasai teste swab ba ema ne’ebé kontaktu besik ho pasiente pozitivu COVID-19, sira rejeita.

“Ha’u husu lalika fiar rumoris sira ne’ebé ema espalla tun sa’e iha rede sosiál. Tanba ha’u rona komunidade Uma Quic lakoi simu vasina, maibé moras ne’e perigu liu ba ema idade avansadu. To’o doutór senior mós infetadu moras ne’e,” nia akresenta.

Nia fó sasin, katak infetadu COVID-19 maibé kondisaun ladún grave tanba simu ona vasina kompleta.

“Ha’u simu ona vasina dala rua maibé foin lalais ha’u mós pozitivu COVID-19, ne’ebé ha’u la tama serbisu kuaze semana rua. Ha’u-nia sorte, ha’u simu vasina dala-rua, se lae ha’u-nia vida laiha ona, tanba ne’e labele ko’alia dehan moras ne’e bosok tanba kona ona ha’u ne’e maka ha’u ko’alia,” Januário Sores konta tuir.

Tuir dadus, óbitu COVID-19 ne’ebé rejista iha territóriu hahú 20 marsu 2020 to’o agora hamutuk 113, nee’ebé hosi númeru ne’e rejista ema na’in-lima hosi Viqueque no kazu ativu ne’ebé daudaun iha izolamentu rezidénzia Administradór no Polo Universidade Nasional Timor-Lorosa’e (UNTL) Viqueque hamutuk na’in-27.

Komunidade Viqueque ne’ebé simu ona vasina doze dahuluk hamutuk 28.132 reprezenta 64% no vasina doze daruak hamutuk 14.964 reprezenta 53%.

Jornalista : Vitorino Lopes da Costa

Editora     : Julia Chatarina

HAKEREK NO HATÁN

Please enter your comment!
Please enter your name here