Kondisaun uma-lulik, hosi uma-lisan Opa, suku Tapo-Taz, ne’ebé ahi han mutuk, domingu (26/09). Imajen TATOLI/Sérgio da Cruz

BOBONARO, 26 setembru 2021 (TATOLI)–Ahi han mutuk uma-lulik, hosi uma-lisan Opa, suku Tapo-Taz, postu administrativu Bobonaro,munisípiu Bobonaro, iha domingu ne’e maizumenus tuku 13:25.

Xefe suku Tapo-Taz, Xavier Barreto Cardoso, informa, akontesimentu ne’e akontese bainhira uma-na’in laiha fatin akontesimentu.

“Uma ne’e ahi han mutuk kedas, sasán ida mós la konsege salva, maibé la rezulta ema ruma kanek no mate tamba provizoriumente uma ne’e mamuk hela, na’in iha hela mate-uma ida, ne’ebé bainhira nia mai, uma ho kondisaunmutuk ona,” Líder komunitáriu ne’e hateten ba Agência TATOLI, via telefónika, domingu ne’e.

Nune’e, iha akontesimentu ne’e kedas, komunidade suku Tapo-Taz organiza malu hodi halo intervensaun maibé la konsege salva sasán no uma tamba anin bot halo volume ahi maka’as liu tan no konsege kontaktu ekipa Bombeiru Bobonaro ne’ebé mai hosi distánsia dook no ho ahi mate, maibé konsege halo intervensaun.

“Ahi ne’e han hosi laran mak sai de’it, entaun komunidade haree no ajuda lori bee hodi rega atu salva uma seluk, maibé agora ahi nia grau atu fó impaktu ba uma-lisan hamutuk 18 ne’ebé besik malu laiha, tamba komunidade konsege hamate no agora uma ida de’it mak estraga,” nia konta tuir.

Provizoriumente Líder Komunitáriu no komunidade sira seidauk identifika kauza prinsipál hosi akontesimentu ne’e tamba ahi han derepente de’it.

Akontesimentu ne’e halo labarik kiik no komunidade ne’ebé hela besik konsege trauma, tamba ahi han ho volume maka’as.

Komunidade ajuda hela uma-na’in, nune’e provizóriamente ba hela ho familia sira tamba sasán ida mos la konsege salva.

Ba kestaun ne’e, Agência TATOLI tenta halo konfirmasaun ho vítima, maibé seidauk bele halo komentáriu ruma tamba sei iha kondisaun trauma no triste.

Enkuantu, uma-lulik ne’e konstrui ho tipu semi permanente, ne’ebé hada ho Batako no kakuluk taka ho du’ut.

Jornalista : Sérgio da Cruz

Editora      : Julia Chatarina

HAKEREK NO HATÁN

Please enter your comment!
Please enter your name here