Liga Feto Bobonaro 2021, ekipa Manu Aman ho Faomahon lansa kontra atake ih jogu abertura, sábadu (25/09). Imagen Tatoli/Sérgio da Cruz

BOBONARO, 25 setembru 2021 (TATOLI)-Asosiasaun Futeból Bobonaro (AFB sigla portugues), sabado (25/09), iha kampu futeból Maliana, ofisiálmente halo abertura jogu feto époka 2021.

Klube ne’ebé partisipa iha jogu ne’e mai hosi Postu Administrativu Balibo, Maliana no Atabae mak hanesan, Manu Aman,  Faomahon, Rokon FC, Solugolu Central FC, Miguir FC, Gudan Putih FC no Cavalo Fronteira FC.

Iha jogu primeira jornada époka 2021 hahú uluk hosi ekipa Manu Aman FC kontra Faomahon FC.

Iha inísiu jogu ekipa rua halo kontra atake ho ida-idak nia táktika jogu. Manu Aman FC ataka maka’as iha liña oin, nune’e Faomahon FC ataka iha liña eskerda hodi bele hetan oportunidade ba sira-nia ambisaun rezulta golu.

Jogu lao iha minutu 23, sorte di’ak monu uluk ba Manu Aman FC liu hosi jogadora avansada Noviana S. Ramos (7) fura uluk rede Faomahon hodi muda rezultadu ba 1:0.

Eskore ne’e la hamate ekipa Faomahon nia vontade hodi hasae tan sira nia ritmu jogu halo ataka maka’as iha liña oin. Esforsu ne’e ikus mai defeza Manu Aman hamonu Jogadora Rosaria Jesica (12) iha area risku, arbítriu deside penalidade, maibé oportunidade osan mean ne’e jogadora Avansada Rosaria Jesica la konsege ezekuta ho susesu, tanba bola ba loos de’it guarda rede nia liman.

Haku’ur ba segunda parte ekipa rua kontinua lansa kontra atake ba malu. Jogu lao minutu lima de’it oportunidade monu fali ba Faomahon, liuhosi jogadora Felismina Sanches (19) susesu fura golu ida hodi muda rezultadu ba 1:1.

Ekipa rua hasae tan ritmu jogu atu hadau vitória, maibé la konsege atinje alvu to arbiru deside hakotu jogu iha minutu 90, ho rezultadu empata.

Jogu ne’e lidera hosi Árbitru lokál, Marcelino Baptista, Asistente primeiru, Asistente segundu Ricardo Verdial. Árbitru hirak ne’e tuir ona formasaun hosi Federasaun Arbitrajen Nasional ho sertifikadu nivel lokál.

Prezidente Asosiasaun Futebol Bobonaro, Domingos Moniz, hateten eventu ne’e AFB realiza atu dezenvolve talentu feto nia iha mundu futeból atu bele reprezenta Munisípiu Bobonaro ba kompete iha liga feto nasionál no mós internasionál.

AFB daudaun ne’e iha ona jogadora maibé jogadora  hirak ne’e la liu iha selesaun atu kompete iha Liga Feto Timor-Leste  no presiza atu treina no aprende barak liután.

Iha fatin hanesan, Sekretáriu Autoridade Munisípiu Bobonaro, Julio Carvalho Caero, agradese ba AFB tanba bele realiza eventu ne’ebé ho inisiativa atu fanun feto involve iha mundu futeból.

Nia sujere ba jogadora sira atu uza oportunidade no hatudu jogu ho téknika no disiplina atu bele hetan prestasaun.

Jogu ne’e realiza tamba hetan apoia fundus hosi Federasaun Futeból Timor-Leste (FFTL) ho montante orsamentu $1.000, maibé  orsamentu ne’e sei fahe ba parte rua, pursentu 30 sei uza ba administrasaun no 70% realiza jogu, hola taxa, inklui selu árbitru.

Klube ne’ebé sei sai vensedór iha eventu ne’e, klasifikasaun dahuluk sei simu $250 ho taxa, vensedór daruak simu $200 ho taxa, datoluk simu $150 ho taxa. Enkuantu ba mellor markadór $50, mellor jogadora $50 no mellor ekipa $50.

Jornalista       : Sérgio da Cruz

Editor             : Francisco Simões

 

HAKEREK NO HATÁN

Please enter your comment!
Please enter your name here