DILI, 25 setembru 2021 (TATOLI) – Jogu Liga Feto Timor (LFT) ne’ebé hala’o iha kampu Federasaun Futeból Timor-Leste (FFTL), Dili, sábadu loraik ne’e, ekipa Primeira Divizaun Buibere FC manan Maranatha FC 2-0.
Iha minutu primeiru hahú ekipa rua lansa kedan kontra ho atake ba malu tuir tékniku ida-idak nian. Ekipa Maranatha hala’o jogu ho ofensivu ho ritmu ne’ebé maka’as hodi buka hatama golu.
Buibere joga ho kalma no la ansi halo golu bainhira hetan oportunidade foin karrega no halo golu. Nune’e iha minute ‘31, oportunidade di’ak mosu duni ba Buibere liu husi jogadora Tasya Duarte ‘lees’ uluk rede Maranatha hodi muda rezultadu ba 1-0.
Jogu kontinua manas liu tan, Maranatha nafatin esforsu hodi halo golu ruma, maibé la konsege tanba defeza Buibere sempre hamate sira nia jogu.
Husi golu ne’e mak termina ona jogu iha primeira parte ba ekipa rua no provizóriu Maranatha tenke hela ho zero no Buibere provijoriu lidera jogu ho rezultadu 1-0.
Haku’ur ba segunda parte, ekipa rua (2) nafatin hatudu jogu hodi lansa nafatin kontra ho atake ba malu iha kampu laran. Buibere kontinua mantein nia pozisaun hodi halo jogu ho kalma no defensive uitoan.
Iha minutu ’46, jogadora Nilda Romana ‘les’ tan golu ida hodi hatuur rezultadu ba 2-0. Husi golu ne’e halo Buibere nia rezultadu namlele dook ona husi Maranatha maski halo atake barak maibé atake hirak Maranatha halo ne’e nunka kona iha alvu.
Esforsu atake hirak ekipa rua halo obrigadu tenke hela de’it hanesan kontra ho atake tanba laiha tan golu ruma to’o minutu 90 termina, vitoria hela ba Buibere (2) no Maranatha tenke hela ho zero (0).
Jornalista : Hortencio Sanchez
Editór : Francisco Simões
