Sentru turizmu komunitáriu lagoa Henumo, iha suku Souro, Lautém, sesta (24/09). Imajen TATOLI/Natalino Belo

LAUTÉM, 24 setembru 2021 (TATOLI)–Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, apresia ho inisiativa joven iha suku Souro, postu administrativu Lospalos, munisípiu Lautém ne’ebé konstrui lagoa Henumo sai fatin turizmu komunitáriu.

“Ha’u apresia kreatividade joven iha suku Souro ne’ebé konstrui lagoa Henumo sai turizmu komunitáriu ne’ebé atrai komunidade iha Lautém no Dili atu buka anin fresku no pasa férias,” Sekretáriu Estadu Akara, hateten, bainhira vizita ba fatin turizmu komunitáriu, sesta ne’e.

Notísia relevante: Lagoa Henumo Souro loron ida hetan rendimentu $50 hosi vizitante

Governante ne’e husu ba komunidade sira atu vizita fatin ne’e hodi halakon hanoin oinoin, tanba lagoa Henumo hanesan fatin fresku ho ambiente naturál tanba konstrusaun utiliza materiál lokál hanesan bambú, tali metan no iha mós ai-han tradisionál atu vizitante sira konsumu.

Iha biban hanesan, Jestór Sentru turizmu komunitáriu lagoa Henumo, Fabrício Joel Xavier, hateten, transformasaun lagoa sai fatin turizmu komunitáriu hahú funsiona iha loron 02 abríl tinan ne’e.

Durante ne’e, vizitante maioria Lautém-oan no balun hosi Dili, ne’ebé bainhira hakarak tama kada ema ida selu $1 no kada estudante selu $0,50.

“Vizitante kuaze loron ida másimu ema na’in-100, liuliu iha loron sábadu no domingu ne’ebé rendimentu hirak ne’e utiliza fali ba operasionál,” Jestór ne’e informa.

Aleinde ne’e, lagoa ne’e iha ikan atu vizitante sira bele kail no kompleta ho fasilidade kámara vijilánsia, nune’e bele asegura vizitante sira bainhira hetan asidente ruma bele hetan atendimentu lalais.

“Daudaun, ami konstrui fatin ne’e kuaze 30% no planu sei kontinua aumenta item balun hodi sai fatin turizmu atu atrai turizta lokál no internasionál hodi vizita suku Souro no fó oportunidade serbisu ba joven sira,” nia akresenta.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here