DILI, 24 setembru 2021 (TATOLI) – Sekretáriu Estadu Juventude no Desportu (SEJD), Abrão Saldanha, hateten programa empreendedorizmu ba juventude sira sei hala’o iha suku hotu iha Timor-Leste.
“Programa empreendedorizmu ne’e sei hala’o iha Timor laran tomak. Alvu ita nian ne’e tenke ba to’o iha suku sira hotu,” Abrão hateten ba Agência Tatoli iha edifísiu SEJD, Dili, sesta ne’e.
Daudauk ne’e ekipa ba programa ne’e iha munisípiu hotu balun disemina hela informasaun ba suku sira ne’ebé seidauk hatene.
“Programa ne’e iha ona faze hatama proposta, halo verifikasaun ba joven sira ne’ebé interese ba programa ne’e nia inisiativa. Agora semana rua liubá iha Timor laran tomak iha ona grupu 627 aplikante hakarak hetan oportunidade hodi hetan apoiu ne’ebé SEJD sei fó, hosi númeru ne’e balun iha ona faze avaliasaun, balun sei kontinua,” nia dehan.
Ba programa ne’e Governu liu hosi SEJD aloka orsamentu hamutuk $600,000.00-resin. Hosi osan ne’e 10% ba jestaun restu ba hotu grupu sira ne’ebé hetan oportunidade.
Mekanizmu ba aplikante sira atu aplika kada munisípiu loke iha sentru juventude ne’ebé estabelese ona iha Munisipiu ida-idak no servisu hamutuk ho autoridade lokál sira.
Programa ne’e foka liu ba joven sira ne’ebé kria grupu halai liu ba servisu kriativu agrikultura, pekuária, turizmu, konservasaun ambientál.
“Iha sentru juventude sira mak halo rejistu ba sira depois ba halo assessment ba sira nia grupu tebes halo servisu duni ka lae depois sentru sira rekomenda ba Governu lokál hamutuk ho liña ministerial sira hanesan agrikultura, turizmu, indústria, kooperativu harii ekipa ida hodi deside grupu ida ne’ebé mak merese liu atu hetan apoiu ne’e,” nia esplika.
Programa ne’e sei hahú 2021-2022 ba oin hodi hadi’a joven sira nia moris ba oin.
Jornalista : Hortencio Sanchez
Editór : Francisco Simões
