Edifísiu eskola Ensinu Sekundáriu Jerál (ESJ) 04 setembru, Balide, Dili. Imajen Tatoli/dok.

DILI, 24 setembru 2021 (TATOLI) – Diretór Eskola Ensinu Sekundáriu Jerál (ESJ) 4 setembru UNAMET, Balide, husu ba Ministériu Edukasaun atu foti media lisensa sein vensimentu ba profesór ne’ebé la simu vasina.

Diretór Sergio da Cruz husu ba MEJD labele impede prosesu ensinu aprendizajen aula prejensiál ba estudante 4.115  tan de’it profesór 24 ninia kauza moras no laiha justifikasaun.

“Loloos Ministériu Edukasaun bele bolu profesores sira seidauk vasina ne’e hateten ba sira tanba imi ta’uk imi la vasina entaun Ministériu fó lisensa ba imi sein vensimentu”. Dehan Diretór Sergio bá ajénsia tatoli iha eskola 4 setembru Balide, sesta ne’e.

Nia esplika totál profesór iha eskola ESJ 4 setembru hamutuk 111, na’in 86 simu ona vasina, falta 24 mak seidauk vasina. Profesores 24 seidauk vasina ne’e, na’in 2 moras stroke, na’in 2 inan fó susu, na’in 1 foin livre hosi izolamentu fulan 6 mak foin bele vasina no na’in 1 tensaun alta Enkuantu na’in 18 laiha justifikasaun to’o agora.

Tuir nia, profesór 24 seidauk vasina tanba moras no laiha justifikasaun ne’e, Ministériu jeizer tenke prienxe formuláriu aneksa ho razaun fundamentál ne’ebé iha inklui rezultadu ruma hosi ospitál karik iha moras komplikadu.

Dirijente másimu ne’e dehan kuandu profesores prienxe ona formuláriu, nia sei submete dokumentu sira ne’e bá MEJD atu hetan desizaun ruma atu nune’e labele prejudika fali prosesu ensinu aprendizajen ba estudante sira.

“Ha’u sei submete formuláriu sira ne’e bá Ministériu Edukasaun iha segunda feira atu hetan desizaun ruma kona-bá profesores 24 ninia razaun,” tenik nia.

Enkuantu parte eskola kuandu haree didi’ak prosesu aprendizajen ba estudante sira ne’e laiha impaktu ida tanba profesores 24 ne’e balun hanorin hamutuk de’it matéria ida. Tan ne’e, Ministériu Edukasaun tenke  rezolve kazu sira ne’e atu husik eskola kontinua ninia atividade bá estudante-sira

Diretór Eskola Ensinu Báziku Sentrál Terseiru Siklu (EBC) 10 dezembru, Comoro, Calistro Guterres, informa katak sira hetan ona autorizasaun hosi Ministériu Edukasaun bele re-ativa ona atividade ensinu aprendizajen aula prejensiál ba estudante 1.038, ne’ebé segunda feira sira sei realiza ezame segundu periodu.

“Ita iha totál professor 49 aumenta tan administrasaun rua (2), guarda rua (2) totál 53, maibé profesores na’in lima (5) seidauk vasina tanba moras na’in tolu (3) moras stroke, na’in rua (2) moras komplikadu. Ita submete ona relatóriu aneksa ho  sira na’in lima (5) ninia rezultadu saúde bá Ministériu Edukasaun,” nia hateten.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here