MAP no KOICA asina akordu projetu melloramentu no kadeia valór agríkola, iha auditorium Ministériu Finansa, sesta (24/09). Imajen TATOLI/Egas Cristóvão

DILI, 24 setembru 2021 (TATOLI)–Governu liuhosi Ministériu Agrikultura no Peska (MAP) selebra akordu ho Ajénsia Kooperasaun Internasionál Koreia (KOICA, sigla inglés) kona-ba projetu melloramentu sekuénsia valór agríkola.

Ministru Agrikultura no Peska, Pedro dos Reis. Imajen TATOLI/Egas Cristóvão

“Akordu ne’e hatudu kooperasaun entre Ministériu Agrikultura no Peska no Governu Koreia liuhosi nia Ajénsia KOICA, atu tulun malun ba melloramentu produsaun ortikultura iha Timor-Leste,” Ministru Agrikultura no Peska, Pedro dos Reis, hateten, hafoin selebra akordu iha edifísiu Ministériu Finansa, Aitarak-laran, sesta ne’e.

Akordu ne’e sei implementa entre tinan 2021 to’o 2025 no sei prevee mós asisténsia téknika no fornesimentu materiál sira hosi KOICA ho valór millaun $6.

MAP no KOICA asina akordu projetu melloramentu no kadeia valór agríkola, iha auditorium Ministériu Finansa, sesta (24/09). Imajen TATOLI/Egas Cristóvão

Nune’e, projetu ne’e sei kontribi hasa’e setór agríkola no ortikultura, ho objetivu atu hasa’e produtividade iha área prioritária sira.

“Projetu ne’e sei implementa iha munisípiu Aileu, Ainaro ho Liquiçá nu’udar pilotu, no tuir teste rai ne’ebé parte ekipa tékniku KOICA no MAP hahú iha minisípiu poténsia ba produsaun ortikultura,” Ministru ne’e subliña.

Tanba ne’e, Governante ne’e husu ba tékniku MAP iha munisípiu tolu ne’e atu jere no halo akompañamentu  atu fó susesu iha implementasaun.

“Ha’u kongratula Governu Koreia liuhosi apoiu KOICA, hakarak apoia MAP hodi dezenvolve no hasa’e produsaun agríkola iha Timor-Leste,” nia apresia.

Reprezentante KOICA iha Timor-Leste, Eunju Cha. Imajen TATOLI/Egas Cristóvão

Iha biban hanesan, Reprezentante Rezidente KOICA iha Timor-Leste, Eunju Cha, hateten, akordu ne’e nuudar kooperasaun Governu Koreia atu serbisu hamutuk ho  MAP hodi dezenvolve setór agrikultura iha Timor-Leste.

“Ami hakarak serbisu hamutuk MAP liuhosi programa ne’ebé iha akordu  hodi dezenvolve di’ak liután setór ortikultra iha Timor-Leste,” nia kompromete.

KOICA iha kompromisu kontinua apoiu Timor-Leste hodi dezenvolve iha setór hotu, la’ós de’it iha setór agrikultura.

Entretantu, Diretór Servisu Agrikultura Munisípiu Ainaro, Nalia de Orleans, apresia no kontente tanba projetu ne’e implementa mós iha suku Orai, postu administrativu Maubisse, munisípiu Ainaro, ne’ebé mós hanesan área potensiál ba produsaun ortikultura.

Jornalista : Natalino Costa

Editora      : Julia Chatarina

HAKEREK NO HATÁN

Please enter your comment!
Please enter your name here