Autoridade RAEOA halo sensibilizasaun kona-bá vasinasaun no husu autoridade lokál sira enkoraja komunidade atu simu vasina. Imajen TATOLI/Abílio Elo Nini.

OÉ-CUSSE, 24 setembru 2021 (TATOLI)—Autoridade RAEOA halo sensibilizasaun no husu ba autoridade lokál sira hosi suku ualu (8) iha sub-rejiauun Pante Makasar, atu enkoraja komunidade hakbesik aan ba sentru no postu sáude sira atu simu vasina.

Notísia Relevante: COVID-19 iha RAEOA: pozitivu rua, ativu 47 no rekoperadu 260

Sekretáriu Rejionál Asuntu Saúde, Manuel da Costa, hateten sensibilizasaun ne’e ho intensaun atu hametin koordenasaun liña setorál ho parseriu sira hanesan xefe suku, xefe aldeia ho estrutura tomak, jestór no Ofisiál Polísia Suku (OPS) atu hamutuk fahe informasaun ba komunidade iha baze hodi partisipa iha kompaña vasinasaun.

“Vasina iha suku tenke la’o hodi kombate COVID-19, entaun komunidade hotu-hotu tenke partisipa hodi simu vasina. Ami husu ba líder konunitáriu sira atu kontinua enkoraja komunidade simu vasina, tanba persentajen vasinasaun iha Oé-Cusse sei menus,” Manuel da Costa hateten iha serimónia halo sensibilizasaun ba autoridade lokál no OPS sira iha suku Naimeco, sub-rejiaun Pante Makasar, Oé-Cusse, sesta ne’e.

Iha sensibilizasaun ne’e, iha asuntu importante rua ba autoridade lokál sira uza hodi konvense komunidade atu labele tauk simu vasin, no esplika ba komunidade kona-bá vasina nia efetividade pozitivu ba komunidade, tanba autoridade lokál mak enkoraja komunidade atu labele rona informasaun falsu hodi rona de’it autoridade no pesoál saúde sira.

Sekretáriuu Rejionál Asuntu Administrasaun, Martinho Abani Elu, enkoraja líder komunitáriu sira atu hakbesik aan ba kada uma kain hodi identifika komunidade ne’ebé seidauk simu vasina ka pasiva, tenke enkoraja atu simu vasina hodi bele kombate COVID-19 iha Oé-Cusse.

“Xefe suku ho xefe aldeia servisu hamutuk ho OPS, la’o tama-sai hosi uma ba uma atu identifika sé mak seidauk simu vasina, tenke enkoraja nia atu simu vasina. Maibé ida-ne’ebé la vasina ne’e, labele auutoriza tuir atividade iha suku laran. Sé mak iha kartaun vasina, bele halo movimentu ihas suku laran,” nia dehan.

Xefe Suku Costa, Aleixo Abi, agradese ba autoridade tanba sensibiliza nafatin programa Prevensaun no Mitigasaun COVID-19 iha RAEOA liu-liu ba lidér komunitáriu atu kontinua habelar no enkoraja komunidade partisipa simu vasina.

“Populasauun iha RAEOA simu vasina ne’e sei menus, tanba komunidade sei tauk atu simu vasina. Tanba ne’e, iha oportunidade ne’e ami sujere nafatin tenke servisu hamutuk atu hato’o informasaun ba komunidade sira, nune’e sira bele hakbesik-aan ba fasilidade saúde atu simu vasina,” nia dehan

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here