BOBONARO, 24 setembru 2021 (TATOLI)—Sekretáriu Autoridade Munisipál Bobonaro, Júlio Carvalho Caero, kontinua apela ba funsionáriu públiku iha munisípiu ne’e, atu simu vasina.
“Funsionáriu hosi parte edukasaun, barak mak seidauk simu vasina. Ami sei ko’alia ho diretór, bainhira funsionáriu lakohi simu vasina, tenke haree halo avaliasaun dezempeñu,” Júlio Carvalho Caero, hato’o kestaun ne’e, iha salaun Kámara Dioseze Maliana, sesta ne’e.
Notísia relevante:Autoridade Bobonaro esforsu hasa’e kobertura vasinasaun
Nia konsidera funsionáriu ka profesór-sira ne’ebé lakohi simu vasina, ne’e la hadomi estudante-sira nia futuru, tanba daudaun ne’e kritéria atu re-ativa aula prezensiál iha postu administrativu Maliana ho Cailaco, professor-sira tenke hatudu kartaun vasina.
Nune’e mós reprezentante Diretór Serbisu Edukasaun Munisipál, Bobonaro, Domingos Pinto Magno, hateten daudaun ne’e rekolla hela dadus funsionáriu no profesór ne’ebé simu ona vasina doze dahuluk no daruak.
Alende ne’e, Xefe suku Manapa, Jeferino Loco-Bere husu ba autoridade munisipál atu kontrola funsionáriu públiku-sira, tanba barak seidauk simu vasina.
Nia mós husu ba funsionáriu iha nível munisípiu, tenke sai ezemplu ba komunidade atu tarjetu vasina iha munisípiu ne’e bele atinje ho lalais.
Tuir dadus hosi Ministériu Saúde, iha 24 setembru, númeru vasina COVID-19 iha Bobonaro iha ona 42,2% ba doze dahuluk no doze daruak hamutuk 14,9%.
Evolusaun surtu COVID-19 iha 24 setembru, Bobonaro rejista kazu positivu haat, rekoperadu laiha, kazu ativu 96, kumulativu rekoperadu 465, kumulativu kazu konfirmadu 570 no kumulativu óbitu sia.
Jornalista: Sérgio da Cruz
Editór: Cipriano Colo