Primeiru-Ministru no Ministru Interiór, Taur Matan Ruak, hala'o enkontru ho Adidu Seguransa Timor-Leste ba Jakarta-Indonézia, Komisáriu Polísia Julio Hornay, iha Rezidénsia Ofisiál, Farol, sesta (24/09). Imajen TATOLI/Francisco Sony

DILI, 24 setembru 2021 (TATOLI)–Adidu Seguransa Timor-Leste ba Jakarta-Indonézia, Komisáriu Polísia Julio Hornay, hasoru malu ho Primeiru Ministru no Ministru Interiór, Taur Matan Ruak, hodi relata progresu serbisu.

“Ha’u mai hato’o atividade serbisu no relatóriu tinan 2020 nian ba Primeiru-Ministru ne’ebé hanesan mós Ministru Interiór, liuliu  partilla kooperasaun serbisu ne’ebé hala’o iha Indonézia iha área seguransa ho Polísia Repúblika Indonézia (POLRI, sigla Indonézia),”  Komisáriu Polísia Julio Hornay, hateten, hafoin reuniaun iha Palásiu Governu, sesta ne’e.

Notísia relevante: Pasajen ilegál fronteira, ema na’in 420 submete ba MP

Durante hala’o knaar iha tinan 2020, Adidu Seguransa hametin kooperasaun entre entidade rua no akompaña kazu balun ne’ebé envolve hosi timor-oan.

Adidu Seguransa Timor-Leste ba Jakarta-Indonézia, Komisáriu Polísia Julio Hornay. Imajen TATOLI/Francisco Sony

Julio Hornay akompaña kazu ida ne’ebé envolve estudante Timor-oan ida ho estudante Indonéziu balun iha Jogyakarta, ne’ebé  konsege tama prizaun, maibé liberta ona no fila mai ona Timór.

Nune’e mós, akompaña halo negosiasaun hodi liberta estudante timor-oan iha Bali ne’ebé komete kazu agresaun fíziku.

Kona-ba kazu Bruno Magalhães no timor-oan balun ne’ebé detein iha sela polísia tanba deskonfia komete kazu krime burla (prodús osan falsu) tuir kodígu penal Indonézia nian.

“Kazu Bruno Magalhães, ami halo koordenasaun ho POLDA Metro Jaya no akompaña nafatin no ikus mai sira hetan pena durante tinan-ida iha prizaun Lembaga Permasyarakatan (LP) Cipinang, Jakarta,” nia akresenta.

Ikus liu, akompaña no koordena ho autoridade Indonézia inklui POLRI hodi deporta timor-oan lubuk ida ne’ebé hakat ilegal hosi fronteira rai-maran ba área juridisaun Indonéziu

“Ita -nia Xefe Governu husu atu hato’o agradesimentu ba Xefe POLRI, tanba ho apoia tomak bele lori filafali timor-oan sira tama ilegál no husu atu kooperasaun ne’e kontinua nafatin atu hametin liután lasu amizade,” nia hatutan.

Jornalista : Antónia Gusmão

Editora      : Julia Chatarina

HAKEREK NO HATÁN

Please enter your comment!
Please enter your name here