Diretora INDMO, Isabel Fernandes de Lima, entrega sertifikadu lisensa no akreditasaun ba Diretor CDC, Vicente Matos Belo, kinta (23/09). Imajen TATOLI/Natalino Belo

BAUCAU, 23 setembru 2021 (TATOLI)–Institutu Nasionál Dezenvolvementu Mão de Obra (INDMO) atribui sertifikadu akreditasaun no rejistu ba Sentru Dezenvolvementu Komunitáriu (CDC, sigla portugés) nu’udar sentru formasaun agrikultura.

“Ita hotu haksolok hamutuk ho estrutura, finalmente ita-boot sira konsege prienxe prosedimentu no kritériu ne’ebé INDMO fó no ikus mai Sentru Dezenvolvementu Komunitáriu rasik lori tinan naruk tebes, hahú hosi diretór sesante to’o agora foin mak hetan sertifikadu,” Diretora INDMO, Isabel Fernandes de Lima, hateten, iha salaun CDC, Triloka, kinta ne’e.

Tuir Diretora ne’e, razaun tinan 15 mak foin atribui sertifikadu tanba presiza prienxe rekezitu ka kritéria, ne’ebé presiza iha kondisaun ba fatin ne’ebé adekuadu hodi aprende.

Seluk mak fasilidade atu formandu sira utiliza, tantu teoria no prátika, hanesan presiza iha rai atu halo prátika hafoin aprende teoria.

Aleinde ne’e, formadór sira presiza iha koñesimentu métodu hanorin hanesan iha sertifikadu pedagójia no koñesimentu espesífiku.

“Métodu durante formasaun, 75% mak prátika no 25% teoria, tanba atu iha abilidade tenki iha prátika,” nia akresenta.

Iha fatin hanesan, Diretór CDC, Vicente Matos Belo, hateten, sentru ne’e presiza hein to’o tinan 15 durante eziste nu’udar sentru formasaun agrikutura, ne’ebé antes ne’e halo ona rejistu iha INDMO no konsege prienxe Kritéria hotu, ikus mai konsege hetan sertifikadu lisensa no akreditasaun sertifikadu I no II.

Sertifikadu II ba espesialista ortikultura, enkuantu sertifikadu I ba área jerál, hanesan hakiak manu, fahi, plantasaun industriál ne’ebé serbisu ho parseiru sira hanesan ‘ai ba futuru’.

“CDC agradese tebes tanba ami hein durante tinan 15 nia laran, konsege hetan ona rekoñesimentu akreditasaun ba área institusionál no sertifikadu, ami kontente no fó korajen nafatin ba joven sira atu aprende iha sentru ne’e, katak estadu rekoñese ona ezisténsia CDC nu’udar sentru formasaun,” Vicente hatutan.

CDC rasik hahú eziste iha tinan 2004, nu’udar NGO no hahú sai sentru formasaun iha tinan 2015, ne’ebé gradua ona formandu hamutuk na’in-230 no daudaun kandidatu formandu hamutuk na’in-43 mak tuir sei gradua tan iha tinan ne’e nia rohan.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here