Prezidente TANE Konsumidór, António Ramos da Silva ‘Naikoli’. Imajen TATOLI/Egas Cristóvão

DILI, 23 setembru 2021 (TATOLI)-Asosiasaun TANE Konsumidór hahú prepara karta proposta rejime legál ba Governu, atubele hamosu dekretu-lei ida hodi proteje direitu konsumidór telekomunikasaun sira.

“Ami sei entrega karta ba Ministériu Transporte no Komunikasaun (MTK), Ministériu Turizmu, Komérsiu no Indústria (MTKI) no Autoridade Nasionál Komunikasaun (ANC, sigla portugés) atu hamosu dekretu-lei ida hodi proteje direitu konsumidór sira hosi operadór telekomunikasaun sira,” Prezidente TANE Konsumidór, António Ramos da Silva ‘Naikoli’, informa, iha ninia knaar fatin, Villa verde, kinta ne’e.

Notísia relevante: TANE Konsumidór husu operadór telekomunikasaun oferese servisu di’ak ba sidadaun

Tuir Prezidente TANE, proposta ne’e halo bazeia ba keixa hosi konsumidór no halo estudu balun ne’ebé nota katak, durante ne’e operadór telekomunikasaun hanesan Timor Telecom, Telekomcel no Telemor la fó informasaun klaru kona-ba velosidade internet ba kada pakote no laiha kontratu ne’ebé kesi konsumidór.

Nune’e, asosiasaun ne’e hakarak aprezenta proposta atu iha alterasaun medida lejizlasaun hodi ezije kompañia telekomunikasaun sira fahe informasaun ho klaru no iha kontratu entre konsumidór no operadór sira.

“Durante ne’e, ami sempre simu keixa hosi konsumidór, ne’ebé hafoin analiza no identifika, iha problema iha asesu ba informasaun, liuliu informasaun ne’ebé parte operadór sira la fó kompletu. Exemplu, pakote ida ho folin $1 ba oras 24, maibé la ko’alia nia velosidade,”nia akresenta.

Nune’e mós, TANE identifika konsumidór potensiál sira laiha kontratu ho operadór telekomunisaun sira, ne’ebé fasil atu operadór sira viola direitu konsumidór.

“Ami hakarak Governu hamosu dekretu-lei ida atu halo selebrasaun kontratu pos-pagu no pre-pagu obrigatóriu,” nia subliña.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here