SEFOPE halo sosializasaun kona-ba Lei Traballu ba entidade relevante, iha salaun SEFOPE, Caicoli, kinta (23/09). Imajen TATOLI/Francisco Sony

DILI, 23 setembru 2021 (TATOLI)–Sekretaria Estadu Formasaun Profisionál no Empregu (SEFOPE) halo semináriu hodi sosializasaun Lei númeru 4/2012 21 fevereiru kona-ba Lei Traballu, ba entidade relevante hosi instituisaun Estadu, empregadór no traballadór.

Seremónia ne’e ho tema ’Haforsa akordu koletivu liuhosi prosesu negosiasaun bipartida no tripartida iha serbisu fatin’

Diretór Nasionál Relasaun Traballu SEFOPE, Ângelo dos Santos Valouso. Imajen TATOLI/Francisco Sony

“Disputa laborál ne’ebé akontese, kuaze falla iha negosiasaun, entaun traballadór tenke halai mai iha SEFOPE, maibé iha lei laran hateten katak molok ba tripartida, prosesu tenke liu parte rua,” Diretór Nasionál Relasaun Traballlu hosi SEFOPE, Ângelo dos Santos Valouso, hateten, iha edifísiu Caicoli, kinta ne’e.

Tuir Diretór ne’e, dala barak disputa laborál akontese entre empregadór no traballadór iha fatin serbisu.

“Kuandu mosu dezentendimentu, tuir loloos tenke solusiona entre bipartida, liga ba kestaun ne’e maka traballadór no empregadór ho akompañamentu hosi sidikatu traballadór sira,” nia akresenta.

Ho nune’e, liuhosi sosializasaun, parte SEFOPE  liuhosi Diresaun Traballu  kontinua esforsu hodi informa nafatin, nune’e traballadór no empregadór bele hatene saida maka sira presiza halo hosi lei ne’e.

“Durante COVID-19, sempre sai preokupasaun ba ami, sindikatu no empregadór, nune’e liuhosi meiu ne’e hakarak esplika ba parte rua (empregadór no traballadór) atu buat ruma naksalak  karik iha serbisu fatin, lalika mai to’o iha SEFOPE, maibé importante maka negosiasaun iha kompañia entre traballadór ne’ebé akompaña hosi sindikatu ne’ebé ita bolu bipartida,” nia esplika.

Prezidente Konfederasaun Sindikatus Timor-Leste, Almerio Vila Nova. Imajen TATOLI/Francisco Sony

Iha fatin hanesan, Prezidente Konfederasaun Sindikatu Traballadór Timor-Leste, Almerio Villa nova, iha esperansa hodi atividade ne’e, parte interesdu sira bele entende ho di’ak kona-ba lala’ok iha ambiente traballu, liu-liu bainhira akontese disputa.

“Hosi artigu 20 to’o 23 Lei Traballu hateten dever empregadór no traballadór iha serbisu fatin, ne’ebé sira tenke kumpre,” nia hatutan.

Nune’e mós, Inspetór Jerál Traballu, Rofino Lopes dos Reis, hateten, papél Inspesaun Jerál Traballu (IGT, sigla portugés) iha ámbitu ne’e importante tanba bele esplika kestaun balun liga ho infrasaun sira bainhira empregadór balun viola direitu traballadór iha serbisu fatin. 

Semináriu ne’e partispa hosi instituisaun Estadu, traballadór inklui reprezentante Kámara Komérsiu no Indústria, Timor-Leste (CCI-TL, sigla portugés).

Jornalista : Natalino Costa

Editora    : Julia Chatarina

HAKEREK NO HATÁN

Please enter your comment!
Please enter your name here