DILI, 23 setembru 2021 (TATOLI)—Sekretaria Estadu Formasaun, Profisionál no Empregu (SEFOPE) liuhosi Diresaun Nasionál Traballu rejista disputa laborál iha fatin serbisu hamutuk 300, iha tinan 2020 to’o 2021 nia laran.
“Durante situasaun COVID-19, ami rejista kazu disputa laborál hamutuk 300-resin, ne’ebé hosi totál kazu ne’e ami konsege rezolve kazu hamutuk 162,” Diretór Nasionál Relasaun Traballu hosi SEFOPE, Ângelo dos Santos Valoso, hateten, iha ninia knaar fatin, Caicoli, kinta ne’e.
Kazu laborál 200 resin konsege rezolve ho meiu akordu koletivu, liuhosi negosiasaun bipartida iha serbisu fatin entre traballadór no empregadór.
Aleinde ne’e, Diretór ne’e dehan, kazu laborál balun hodi solusiona tuir dalan mediasaun arbitrajen ka tribunál hodi solusina.
Kazu hirak ne’e relasiona ho tipu kontratu liuliu hapara serbisu traballadór la ho justifikasaun no kazu razaun estruturál tanba laiha kbiit no kapasidade atu selu.
“Ita haree disputa laborál akontese tanba empregadór ninia rendimentu menus atu selu traballadór,” nia afirma.
Entretantu, SEFOPE halo ona sosializasaun ba lei númeru 4/2012 21 fevereiru, kona-ba Lei Traballu, ba entidade relevante sira hosi instituisaun Estadu, empregadór no traballadór.
Objetivu sosizalizasaun ne’e atu haforsa akordu koletiva, liuhosi prosesu negosiasaun bipartida no tripartida iha ambiente traballu, tuir artigu 20 to’o 23, kona-ba dever empregadór no trabaladór.
Jornalista : Natalino Costa
Editora : Julia Chatarina
