Sekretáriu Estadu Formasaun Profisionál no Empregu, Alarico do Rosário. Imajen TATOLI/Natalino belo

BAUCAU, 23 setembru 2021 (TATOLI)—Sekretáriu Estadu Formasaun Profisionál no Empregu (SEFOPE), Alarico do Rosário, no komitiva hamutuk ho Prezidente Autoridade Munisipíu (PAM) Baucau, Olívio ‘Bou-Lesa’ Freitas, halo enkontru prelemináriu hodi diskute kona-ba reativa Sentru Formasaun Dili Institute of Technology (DIT) iha Baucau.

“Enkontru ohin ho PAM Baucau iha ligasaun ho Sentru Formasaun DIT Baucau, ne’ebé durante tinan naruk paradu, ho objetivu atu reativa fali sentru formasaun ne’e, atu nune’e bele kapasita joven iha Baucau,” Sekretáriu Estadu Alarico do Rosário hateten iha Administrasaun munisipál, Villa nova, kinta ne’e.

Sentru Formasaun DIT Baucau hahú eziste iha tinan 2006, ne’ebé fó formasaun iha área karpintaria, soldadura, kanalizasaun, eletrisidade no pedreiru, ne’ebé hetan ona sertifikadu hosi Governu liuhosi Institutu Nasionál Dezenvolvimentu Mão de Obra (INDMO), maibé ikus mai mosu dezentendimentu internál entre institutu rasik.

“Ami mai atu husu Autoridade munisipál hola parte negosia ho sentru formasaun hodi solusiona polémika ne’ebé mosu internamente,” nia akresenta.

Aleinde ne’e, responsável sentru atribui ona karta ba SEFOPE atu responsabiliza no tau-matan ba sentru iha tinan 2016, maibé ikus mai mosu dezentendimentu internál entre nasionál no responsável munisipál.

“SEFOPE ninia polítika hakarak foti fatin ne’e inklui sasán ne’ebé iha, atu nune’e reativa hikas prosesu aprendizajen iha área espesífiku iha munisípiu Baucau no Viqueque, Manatuto no Lautém,” governante ne’e hatutan.

DIT nasionál rasik iha ona akordu hodi fó responsabilidade ba SEFOPE, nune’e bele investe hamutuk ekipamentu.

Ba kestaun ne’e, PAM Baucau, Olívio ‘Bou-Lesa’ Freitas, prontu atu sai mediadór ho parte responsável sentru formasaun, bainhira iha dokumentu nu’udar faktu, hodi buka solusaun ba polémika ne’ebé akontese.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here