Ministru Justisa, Manuel Cárceres da Costa. Imajen TATOLI/Egas Cristóvão

DILI, 23 setembru 2021 (TATOLI)–Ministru Justisa (MJ), Manuel Cárceres da Costa, hasoru malu ho Primeiru-Ministru (PM), Taur Matan Ruak hodi relata progresu servisu ministériu ninian no reseita hosi arrendamentu rai Estadu.

Sekretaria Estadu Terra no Propriedade (SETP) rekolla reseita arrendamentu rai Estadu hosi empreza nasionál no internasionál.

“Kada tinan, previzaun hetan reseita hosi arrendamentu ne’e to’o millaun $6, maibé tinan ne’e menus tebes, ha’u rekoñese katak reseita hosi Terra no Propriedade tinan ne’e tun tanba empreza boot sira barak mak sei deve,” Ministru Manuel Cárceres informa hafoin ramata reuniaun ho PM, iha Palásiu Governu, kinta ne’e.

Notísia relevante: Janeiru-maiu, SETP rekolla millaun $1-resin

Liga ho ho preokupasaun ne’e, Xefe Governu orienta Ministru Justisa atu realiza enkontru ho empreza sira ne’ebé sei deve hodi buka solusaun.

“Ha’u informa ona ba Primeiru-Ministru, ne’ebé orienta ha’u atu realiza enkontru ho sira hodi husu sira-nia konsiénsia katak aluga sasán Estadu tenke selu arrendamentu. Kuandu sira la selu bele fó prejuizu ba Estadu no ha’u mós hetan ona apoia hosi Primeiru-Ministru katak taka kontratu arrendamentu, maibé ha’u sei realiza reuniaun uluk ho sira,” governante ne’e dehan.

Ba kestaun ne’e, Ministru la sita kona-ba totál montante arrendamentu ne’ebé empreza sira deve no empreza sé de’it.

Tuir dadus hosi SETP ne’ebé publika antes ne’e, sidadaun ne’ebé okupa patrimóniu Estadu hanesan edifísiu no rai Estadu hodi halo negósiu hamutuk 1114, ne’ebé ninia presu selu sei haree ba klasifiksaun no poténsia rai, ho presu ne’ebé la hanesan depende uza hela ka halo negósiu.

Aleinde ne’e, rejista 8.340 arrendatáriu iha territóriu ne’ebé mak halo kontratu utiliza patrimóniu Estadu no selu kada fulan.

Enkuantu, arrendatáriu hamutuk 4.115 maka selu ativu, maibé 4.225 mak la kumpre selu arendamentu desde 2017 to’o 2020.

Iha tinan 2019 to’o 2020, SETP rekolla reseita  hamutuk millaun $4,2, enkuantu tinan 2017 to’o 2018, rekolla  millaun $2 resin.

Tuir Lei númeru 1/2003  no dekretu lei númeru 19/2004 ne’ebé ko’alia kona-ba propriedade Estadu no kobra arrendamentu, daudaun presu areendamentu ne’ebé aplika la korresponde ona presu rai iha merkadu ohin loron.

Tanba ne’e, Governu liuhosi Ministériu Justisa sei implementa tabela foun arrendamentu rai no uma Estadu ba públiku.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here